Meclîs wê îro deriyên xwe li sala nû ya qanûndanînê veke. Di siyasetê de bal li ser Pêvajoya Aştî û Civaka Demokratîk e. Hevberdevka Kongreya Demokratîk a Gelan (HDK), Parlamentera DEM Partiyê û Endama Komîsyonê Meral Daniş Beştaş rêveçûna pêvajoyê ji ajansa me re nirxand.
Meral Daniş Beştaş daxuyaniya Serokê Meclîsê Nûman Kûrtûlmûş a bi gotina “Pêvajo di rêya xwe de dimeşe” nirxand û anî ziman ku dewamiya pêvajoyê hêja ye, lê belê bêkêmasî nîne.
Meral Daniş Beştaş li ser qonaxa heyî ya pêvajoyê û berpirsyariyên Meclîsê got, “Pêvajo dimeşe, di vê mijarê de pirsgirêk nîne. Lê belê ya girîng ew e ku çawa dimeşe. Rêveçûna pêvajoyê nayê wê wateyê ku ti pirsgirêk nîne. Hîn jî rapora komîsyonê neketiye meriyetê. Pirsên weke ‘Gelo wê qanûna çarçoveyê bi cih bê anîn?’, ‘Wê kengî bê pêkanîn’, ‘Derbasbûn wê çawa be’ em bi hev re dipirsin”
Beştaş ragihand ku di pêvajoyê de li gel kêmasiyan her wiha zimanekî aştiyê yê hevpar nehatiye avakirin, beşeke girîng a berdevkên desthilatdariyê hîn jî bi zimanê cihêkar ê berê diaxivin û zimanê ku desthilatdarî û medya bi kar tîne bersivê nade pêwîstiyên pêvajoyê.
Parlamentera DEM Partiyê diyar kir ku mercên karkirinê ji bo muxatabê bingehîn ê pêvajoyê nehatiye avakirin û têkildarî statuya Rêber Apo desthilatdariyê helwesteke zelal nîşan nedaye.
Meral Daniş Beştaş anî ziman ku divê pêvajo li pêşberî raya giştî hîn vekirî û zelal bê meşandin û axaftina xwe bi vî rengî dewam kir, “Mînak, hin tişt hene ku divê tavilê bêne kirin. Ya destpêkê: Muxatabê bingehîn ê vê pêvajoyê hîn jî ne xwedî mercên pêwîst ên karkirinê ye. Birêz Ocalan hîn jî li Îmraliyê tê ragirtin, hîn jî derbasî cihê hatiye çêkirin nebûye. Ji ber ku deste ava nebûye. Ji ber ku ew koordînatorê wê desteyê ye. Ji bo ew karibe bixebite, di nava komîsyonê de kî hebe divê ew li gel wî dest bi kar bikin. Ji bo vê jî qanûnek ji vê re divê, qebûlkirinek divê, zemînek divê.
Desthilatdarî bi rêbazeke welê ya siyasî tevdigere ku dixwaze rewşê bi pratîkî dewam bike, pêvajoyê bi gavên de facto bimeşîne, şênber neke, hin mijaran ji raya giştî veşêre yan jî bi rengekî cuda nîşan bide.
Mînak, berdevkên desthilatdariyê hîn jî li ser pozîsyona Birêz Ocalan bi eşkere neaxivin. Yanî hewl didin bi peyamên veşartî vê yekê vebêjin. Ya rast naxwazin raya giştî bi vê zanibe.
Di vê mijarê de helwesta Devlet Bahçelî hîn zelal e. Ew bi xwe vê bi eşkere dibêje. Herî dawî got, divê Birêz Ocalan weke koordînator wezîfeyê bike. Got, divê sûdê ji mafê hêviyê werbigire. Lê belê desthilatdariya AKP’ê di vê mijarê de bi têrkerî eşkere nîne.”
Meral Daniş Beştaş di dewama axaftina xwe de destnîşan kir ku divê zemîneke hiqûqî ji pêvajoyê re bê amadekirin û got, “Di vê mijarê de bîranîn, tecrûbeyên nebaş ên civakê hene. Ji bo ev bîranîn dubare nebe, divê êdî zemîna vî karî, asta wê ya hiqûqî diyar bibe. Divê pozîsyona Birêz Ocalan, mercên wî yên karkirinê bêyî bê dirêjkirin fermî bibe. Mebest ji fermiyetê fermiyeteke ji rêzê nîne, ez qala zemîna hiqûqî dikim. Û divê berdevk jî, desthilatdarî jî li pişt vê bisekinin.”
Di civîna 24’ê Tebaxê de çar komîsyonên jêrîn bi navê Karên Edlî û Hiqûqî, Şopandin û Tespît, Ahengiya Civakî û Yekbûn, Bêçekbûn û Koordînasyona Stratejîk hatibûna vakirin.
Meral Daniş Beştaş der barê rola ku Meclîs divê di dema nû ya qanûndanînê de pê rabe destnîşan kir ku Meclîs û komîsyona ava bike we bibe ‘garantiya’ pêvajoyê.
Parlamenter Meral Daniş Beştaş got, “Meclîs vedibe, em ê jî li wê derê bin. Koordînasyona stratejîk a ku em jê re Koordînasyon, Siyasîbûn û Bêçekbûn dibêjin, xwedî roleke gelekî jiyanî ye. Ne tenê ji Serokkomar û wezîran re, he rwiha divê desteyek welê bê avakirin ku ji civaka sivîl, hêzên demokrasiyê û akademîsyenên pispor re jî vekirî be. Divê desteyek bê avakirin ku di asta herî berfireh de partî tevlî bibin û rast nîne ku ji vê re tenê ‘desteya şopandinê’ bê gotin.
Ne desteyek ku tenê temaşe dike, kar nake. Desteyek welê ku hem dişopîne hem kar dike. Dawiya dawî mirov bi hev re dikare nav lê bike. Lê belê tişta ku Serokê Meclîsê gotiye, weke ku wê tenê bişopîne tê fêhmkirin. Bi dîtina min divê ev ji holê bê rakirin.”
