Hêzên Erka Xweparastinê li Navenda Şehîd Bawer a Ciwanên Şoreşger ên Sûriyeyê li bajarê Dêrikê, bi armanca xurtkirina hevgirtina civakî û şîrovekirina pêşketinên li Sûriyeyê, ji bo malbatên şehîdan û xelkê bajarê Dêrikê yê herêma Cizîrê civînek li dar xist.
Bi dehan malbatên şehîdan û şêniyên herêmê, li gel serokên eşîran û endamên saziyên xizmetguzariyê yên li herêmê beşdarî civînê bûn.
Di civînê de, Fermandarê Giştî yê Hêzên Erka Xweparastinê Nûrî Mehmûd diyar kir ku gelên Sûriyeyê, bi taybetî yên li Bakur û Rojhilatê Sûriyeyê, di çarçoveya ji nû ve avakirina welêt de di qonaxek hesas re derbas dibin û destnîşan kir ku Bakur û Rojhilatê Sûriyeyê rêya sêyemîn, ku rêya diyalogê ye, hilbijartine, “ji ber ku ew rêya herî baş e ji bo xizmetkirina berjewendiyên gel”.
Mehmûd anî ziman ku hikûmeta veguhêz heman rêya hikûmeta berê dişopîne, bi awayekî ku xizmeta berjewendiyên aliyên derve dike, xwe dispêre navendîbûnê. Her wiha bal kişand li ser girîngiya berdewamiya berxwedanê û piştrast kir ku gelên herêmê tevî dorpêçkirin û êrişan paşve gav neavêtine û bi îrade û têkoşîna xwe serkeftin bi dest xistine.
Fermandarê Erka Xweparastinê eşkere kir ku hêzên wan gel ji terorê parastin û rê dane civakan ku saziyên xwe ava bikin û karûbarên xwe li ser bingeha jiyana hevbeş birêve bibin.
Her wiha Nûrî Mehmûd got: ”gelên herêmê li hember hemû dijwariyan rawestiyan û bi raman û felsefeya rêber Abdullah Ocalan ronî bûn, bi vî awayî wan rêveberiyek ava kir ku hemû pêkhateyan di nav xwe de digire, ew ezmûn divê bibe “naveroka Sûriyeyeke nenavendî”.
Fermandarê Giştî yê Hêzên Erka Xweparastinê li Herêma Bakur û Rojhilatê Sûriyeyê Nûrî Mehmûd axaftina xwe wiha bi dawî kir: “Hêzên me bi fedakariyên xwe girîngî û rewatiya xwe li Bakur û Rojhilatê Sûriyeyê îspat kirine lewma divê ew bibin bingeha artêşeke Sûriyeyê ya sibrojê ku hemû gelan ji tundî, dagirkerî û koçberiyê biparêze û li gorî nirx, exlaq û çanda civakê mezin bibe.”
