Gerîlaya YJA Starê Hêvî Azadî 25’ê Mijdarê Roja Têkoşînê ya Navneteweyî ya li dijî Tundiya li Jinê nirxand.
Hêvî Azadî destpêkê jinên ku li hemberî tundiyê li ber xwe didin, jinên têkoşer silav kir û got, “Li cîhanê ji ber ku tundiyek li ser jinê heye berxwedana li beramberî vê, xwedî li xwe derketin, xwedî li jinbûyîna xwe derketin pir girîng e. Em hemû jinên ku di nav van rojan de bi çalakiyan xwedî li xwe û kevneşopiya xwe derdikevin silav û hezkirinên xwe dişînin. Ev tundiya ku tê kirin wê jin bi tekoşîna xwe, bi îradeya xwe ya civakbûna ku li derdora jinê hatiye avakirinê ji holê rake. Îro bi destê desthilatdaran di şexsê jinê de nirxên hatine avakirin hatiye sitandin. Wê jin bi vê têkoşîna xwe xwedî li civakbûyîna xwe derkeve.
Bi fikir û ramanên Rêbertî, têkoşîna ku îro em weke hêzên YJA-Star li ser çiyayan dimeşînin, em ê bibin şopdarê vê kevneşopiyê û em ê xwedî li vê dîrokê derkevin.
Eger mirov bi dîroka xwe nizanibe wê nikaribe vegere cewhera xwe jî. Ji ber dîroka me ji me hatiye sitandin, em nikarin rêxistinbûyîna xwe xurt bikin, yekbûna xwe ava bikin. Di nav civakê de bi zîhniyeta zilam cîhê ku jin tê de herî zêde lewaz e li wê derê derb li jinê tê xistin. Ji bo vê jî di nava pergalê de rojane jin tên qetilkirin, rojane jin tê tinekirin. Ji ber ku di wê derê de jin yekbûyîneke wê çênebûye, xwe rexistin nekiriye, xwe ava nekiriye.
Bi zihniyeta zilam ku jin bê zanist hiştiye her roj bi navê hezkirinê jin tê qetilkirin. Di nava civaka me de jî kapîtalîzm herî zêde bi jinê dilîze, herî zêde dixwaze yekbûyîna jinê xira bike. Bi şîddetê çavê jinê bitirsîne ku jin xwedî li xwe dernekeve ku jin nikaribe bibe ya xwe. Ji bo ku desthilatdariya heyî bikaribe hîn bêhtir xwe bide meşandin li her cihekî jin tê qetilkirin, tundî lê tê kirin.
Çawa civakbûyîna di şexsê jinê de hatiye avakirin, ji hev hatiye derxistin, wê dîsa di şexsê jinê de kombûyîna wê çêbibe. Ev kombûyîn wê bi xwe re azadî, wekhevî ya jin û mêr bîne, wekheviya civaka azad bîne. Bi yekbûyinê rêxistin çêdibe. Bi rabûna kesekî azadî nabe. Ji bo vê jî eger jin bixwazin li beramberî desthilatdariya heyî tekoşîneke xurt bikin, pêwîst e yekbûyîna xwe pêk bîne. Divê her jin dengê xwe bike yek. Jin pêwîst e bibe yek deng, bi vê yekbûyînê dikare civaka azad ji nû ve ava bike. Ji bo vê jî rêxistinbûyîn pêwîst e.”
