Meclisa Malbatên Şehîdan a bajarê Şedadê yê kantona Cizîrê, îro ji bo oxirkirina şervanê QSD’ê şehîd Ziweyid Xelef Ehmed ku di 1’ê Kanûnê de ji ber krîza dil şehîd bûbû, merasîmek li dar xist.
Nûnerên Rêveberiya Xweser, saziyên bajêr û bi dehan şênî tev li merasîmê bûn ku li Goristana Şehîdan a Şedadê hate lidarxistin.
Merasîmê bi rêzgirtinê dest pê kir, piştre merasîmeke leşkerî ji hêla şervanên QSD’ê ve hate lidarxistin.
Ji rêveberên Meclisa Malbatên Şehîdan a bajêr Mihemed El Xilêf axivî û got: “Em ji ber şehadeta kurê wan ê mêrxas, sersaxiyê ji malbata şehîd Ziweyid re dixwazin. Şehîd ronahiya jiyanê, bingeha berxwedanê û rêya serkeftinê ne. Eger xwîna wan nebûya, em ê negihîştibana vê asta ku em îro gihaştinê.”
Ji fermandarên Meclisa Leşkerî ya Şedadê Ehmed El Idêb jî got: “Em ji ber şehadeta hevalekî ku jiyana xwe ji bo welat feda kir, sersaxiyê ji xwe, ji malbata şehîd û ji hêzên leşkerî re dixwazin. Şehîd avakerên rûmeta neteweyan in. Şehîd jiyana xwe dide da ku em bi azadî û bi rûmet bijîn.”
Di dawiya merasîmê de belgenameya şehîd hat xwendin û radestî malbata wî hat kirin. Cenazeyê şehîd bi dirûşm û tilîliyên dayikan spartin axê.
