Komên girêdayî dewleta Tirk ên bi navê El Hemzat, El Emşat û Nuredîn Zengî careke din êrîş birin ser taxên Şêxmeqsûd û Eşrefiyê û ji duh de êrîşeke bê navber tê kirin. Di encama van êrîşan de bi dehan birîndar û şehîd jî hene.
Piştî her hevdîtina ku di navbera Rêveberiya Xweser û Hikumeta Demkî de tê kirin, ev êrîş pêk tê. Ev jî diyar dike ku Hikumeta Demkî diyalogê asteng dike û naxwaze li Sûriyeyê hemû netew jiyan bikin, tenê yek netew, yek al û yek mezhebê qebûl dike. Lewra cara ewil ji gelê Elewî bi hezaran kes qetil kirin û piştre ji gelên Dûrzî jî bi hezaran kes qetil kirin.
Ji duh ve çeteyên dewleta Tirk ên bi ser Hikumeta Demkî ya Sûriyeyê li ser taxên Şêxmeqsûd û Eşrefiyê êrîşeke bê navber didomîne, têkildarî wê yekê jî Parêzer û Şêwermendê Rêveberiya Xweser a Kantona Firatê Mistefa Şêx Mislim ji ANF’ê re axivî.
Mistefa anî ziman ku ew li kêleka gelê xwe yê li Şêxmeqsûd û Eşrefiyê ne û got: “Li kur dibe bila bibe, em li kêleka hemû gelên xwe ne, li ku dera Sûriyeyê dibe bila bibe, em ê heta dawiyê jî xwedî li gelê xwe derkevin û asta diyalogê jî mezintir bikin. Li dijî hemû şeran, divê em zimanê diyalogê pêş bixin. Ji duh ve bê navber li ser sivîlan êrîşeke bêhempa tê kirin, li kêleka wê berxwedaniya gelên me yên li wir di asta herî bilind de ye.
Di ti qanûnê de bi vî şêwazî êrîşkirin û hedefgirtina sivîlan tine ye. Ev tişta ku li Helebê tê kirin, nayê qebûlkirin. Her civîneke diyalogê ya di navbera QSD’ê û Hikumeta Demkî de çareseriyê nêzîk dike. Lê ew bi van êrîşan diyar dikin ku diyalogê qebûl nakin.”
