Li Parka Giştî ya navçeya Ranya ya ser bi Îdareya Serbixwe ya Raperînê, gelek jinên çalakvan bi beşdariya çendîn nivîskar, rewşenbîr, welatparêzên deverê, li dijî bêrêziya li dijî şervanên jin û şehîdan a ji aliyê çend kesan ve ku di serî de Mela Mezher hatiye kirin, kom bûn û daxuyanî dan çapemeniyê.
Daxuyaniya jinên Îdareya Raperînê ku ji aliyê çalakvan Awaz Îsmaîl ve hate xwendin, wiha ye; “Di demekê de ku gelê me bi komployeke navnetewî û herêmî re rûbirû ye û dagirker hewl didin nasnameya me ji holê rakin, mixabin hinek kes bi taybet Mela Mezher bi navê ol û bi zimanê Kurdî dibin berdevkê siyaseta dagirkeran û minberan bikar tînin da ku rûmeta jinên Kurd bişkînin û êrişî pîroziya welat bikin.
Ev şêwazê axaftina hin melayan berdewama heman zihniyeta mêrsalar û dagirkere ku dixwaze jinan ji qada giştî û siyasî dûr bixe û wan bixe bin sînorkirinên kevneperestan.
Tevgera Azadiya Jinan, di pêşengtiya şervanên jin yên fedayî de ku îro li Şêxmeqsûd, Eşrefiyê û deverên din rûmeta mirovan diparêzin, bi fetwayên wiha lewaz û qels nebe. Berevajî vê, ev reftar rûyê rastîn yê kesên ku ol ji bo berjewendiya siyasî bikar tînin û li dijî doza rewa ya gelê xwe derdikevin eşkere dikin.”
Çalakiya jinên Raperînê bi dirûşmeyên li dijî kevneperest û hişmendiya mêrsalar bi dawî bû û piştgiriya ji têkoşîna jinan û berxwedana gel a li dijî êrişên çeteyan û hişmendiya hov hate dubarekirin.
