Daxuyanî li Navenda Kongreya Çand Amedê hate dayîn û hate diyarkirin ku alîkariya mirovî ne ne tercîhek e, berpirsiyariyek e û banga vekirina Deriyê Sînor ê Murşîtpinarê hate kirin.
Serokê Odeya Pîşesazî û Bazirganiyê ya Amedê Mehmet Kaya li ser navê platformê axivî û da zanîn ku ji bo gihandina alîkariyan a bi awayekî bilez û rasterast ew xwediyê hemû derfetan e û got ku tekane rêya vê yekê girêdayî vekirina Deriyê Sînor ê Murşîtpinarê ye. Kaya destnîşan kir ku tirên alîkariyê amade ne û anî ziman ku ger derî were vekirin wê di nava du saetan de konvoya alîkariyê bigihîje bajarê Kobanê.
Hevşaredara Bajarê Mezin a Amedê Serra Bûcak jî bal kişand ser bandorên şerî ên li ser gel, jin û zarokan û da zanîn k u tevî agirbestê jî êrîş tên kirin.
Serra Bûcak anî ziman ku tekane deriyê sînor ê ku bikarin ji Kobanê re alîkariyê bişînin, Deriyê Sînor ê Murşîtpinarê ye û got ku divê li Tirkiyeyê desthilatdarî û muxalefet li hemberî vê krîza mirovî berpirsiyariyan bigirin ser milên xwe.
Di daxuyaniya hevpar a ji aliyê platformê ve hate xwendin de hate diyarkirin ku li Kobanê li gel yên hefteyên dawîn hejmara welatiyên koçber nêzîkî 500 hezarî bûye, binezasî hilweşiyaye, di warên starbûn, xwarin, av û tenduristiyê de krîzeke pir cidî heye. Hate bibîrxistin ku li gorî daneyên Neteweyên Yekbûyî li Sûriyeyê di nava sê hefteyên dawîn de zêdetirî 100 hezar kes ji cih û warên xwe bûne.
Di daxuyaniyê de hate destnîşankirin ku tirên alîkariyê ji bo şandinê amade ne û banga vekirina Deriyê Sînor ê Murşîtpinarê ya ji bo alîkariya mirovî, destûr were dayîn ku rêxistinên civakî bi awayekî rasterast alîkariyan bigihînin herêmê û pêvajo bi awayekî zelal werin birêvebirin, hate kirin. Platformê da zanîn ku ew ê detayên têkildarî kampanyaya ku ji bo Kobanê dane destpêkirin, bi raya giştî re parve bike.
