Desteya Rûspiyan û Meclisa Rûspiyan a Heseke bi dirûşmeya “Bi hev re ji bo parastina civaka xwe, mil bi mil ber bi yekitî û aramiyê ve. Aştiya sivîl berpirsiyariya me ya hevpar e. Gotina me yek e, û ewlehiya me yek e. Na ji fitneyê, na ji zimanê nefretê re” li Hola Şeto ya bajarê Heseke civînek li dar xist. Nûnerên eşîrên Ereb û Kurd û pêkhateyên din, rewşenbîr û nûnerên partiyên siyasî beşdar bûn.
Axaftina destpêkê ya civînê şêwirmendê Êla El Cibûr şêx Ekrem El Mehşûş kir, got: “Em îro ji bo parastina civaka xwe mil bi mil, arastina herêmên xwe ber bi yekitî û aramiyê ve kom bûne. Wê parêzgeha Hesekê xaka jiyana hevbeş û biratiyê ku tê de Kurd, Ereb, Xiristiyan û Êzidî bi hev re dijîn, bimîne. Gelê Hesekê li hember fitne û tehrîdê disekine û têk dibe.”
Dûre Fermandarê Giştî yê QSDˊê Mazlûm Ebdî axivî û diyar kir ku wan peymana 29`ê Çileyê îmze kiriye û di pêvajoya pêkanîna wê de ne. Ebdî destnîşan kir ku ev peyman wek çarçoveyeke sereke ya ji bo hemû gavên siberojê ye.
Gelek axaftin ji hêla şêxên eşîran û rûspiyên herêmê ve hatin kirin û hat diyarkirin ku ew piştevaniya lihevkirina 29ˊê Çileyê dikin, zimanê nefretê û hewldanên derxistina fitneyan di nava pêkhateyan de red dikin û dixwazin girtî werin berdan.
Mazlûm Ebdî jî li ser daxwaza rûspiyan got ew ê efûyek giştî ji bo girtiyan derxin, di çend rojên bê de bi aliyên eleqedar re mijara girtiyan çareser bikin.
‘HESEKÊ WÊ RÊ NEDE FITNEYÊ’
Di dawiya civîna Desteya Rûspiyan de daxuyaniyek hat dayîn û hate gotin ku “Ji cîhanê tevahî re diyar dikin ku wê Hesekê xaka jiyana hevbeş, xweşik û biratiyê bimîne û rojekê jî nabe qada fitne yan jî tehrîdê yan jî zimanê nefretê.
Di vê dema dawî de tehrîdkirin û derxistina fitneyan li tevahî Sûriyeyê bi taybet jî li herêma cizîrê zêde bû û hinan hewl dida mozaîka civakî ya xurt a Sûriyeyê têk bibin. Em ji wan re dibêjin ku em xelk û pêkhateyên Cizîra Sûriyeyê bi Kurd, Ereb, Suryan, Asûr, Tirkmen, Ermen, Misliman, Xiristiyan û Êzidiyên xwe di dirêjahiya dîrokê de mînaka zindî ya biratiyê bûn, me nan, av û aqûbeta xwe bi hev re parve kiriye û hev du di zehmetiyan de parastiye û li dijî rêxistina terorîst sekiniye û têk biriye.
Em wek eşîrên ji tevahî pêkhateyan em ê her tim mertalên ewlehiyê û dibistanên zanîn, hişmendî û aqilmendiyê bin. Em îro di qonaxeke hestiryar re derbas dibin ku pêdiviya wê em ruhê berpirsiyariya dîrokî hilgirin.
DAXWAZÊN XWE WIHA RÊZ KIRIN
Ji lew re em dixwazin ev xalên jêrîn pêk bên:
“Pabendîbûna bi bicihanîna lihevkirinên ku dê entegresyonê pêk bînin û rijandina xwîna Sûriyan rawestînin.
Berpirsiyariya eşîrî: Pabendbûna bi nirxên eşîrî re û em ne artêşek di nav artêşê de ne yan jî şûna artêşê ne.
Rewşenbîrên me: Em rola we di belavkirina çanda hezkiriyê de tekez dikin.
Ciwanên me: Hûn stûnên pêşerojê û xeta yekem a parastinê ji bo welat in.
Zimanê nefretê: Em hemû cureyên zimanê nefretê, tehrîdkirinê û cudakariya neteweyî yan mezhebî bi tundî şermezar dikin.
Hevgirtin di demên dijwar de: Em pabend in ku ji bo çareserkirina pirsgirêkên aborî û civakî piştgiriya hevbeş peyda bikin.
Berpirsiyariya ragihandinê: Em bang li çalakvan û saziyên medyayê li Sûriyeyê dikin ku pabendî yasayên exlaqî yên pîşeyî bin û ji têgînên tehrîdkirinê yên ku mozaîka civakî ji hev dixin dûr bisekinin.
Zimanê diyalogê: Em bi diyalog û danûstandinê bawer dikin ku rêbaza yekane ya çareseriya nakokiyan e.”
Di dawiya daxuyaniyê de soz hat dubarekirin ku mil bi mil yekitî û aramiyê xurt bikin, civakê bi hevkarî û danûstandinê biparêzin û Hesekê modela jiyana hevbeş, xwişk û biratiyê ya tevahî pêkhateyan bimîne.
