Meclîsa Lûtkeya Avhewayê ya Gelan, têkildarî Lûtkeya Ekolojiyê ya 31 a Konferansa Aliyan (COP31) ku dê îsal li Antalyayê were lidarxistin, daxuyanî da. Li dijî konferansê dê bi awayekî hemwext Lûtkeya Avhewayê ya Gelan were lidarxistin û bê protestokirin. Daxuyanî, li avahiya Şaxa Odeya Endezyarên Hawirdorê (ÇME) ya Stenbolê hate dayin û gelek kes beşdar bûn. Di daxuyaniyê de pankarta “Lûtkeya Avhewayê ya Gelan a 2026’an a ji COP31’ê Wêdetir” hate hilgirtin.
Ji Koalîsyona Edaleta Avhewayê Cemîle Kaçarê di daxuyaniyê de dîrokçeya COP’ê vegot û behsa Lûtkeya COP31’ê û Lûtkeya Avhewayê ya Gelan ku dê li Antalyayê bên lidarxistin.
Endama Odeya Endezyarên Hawirdorê ya girêdayî Yektiya Odeyan a Endezyar û Avahîsazên Tirk (TMMOB) Kubra Ayçîçek, di daxuyaniyê de got ku COP a di bin sîwana NY’ê de tê lidarxistin, li şûna çareseriya krîzên avhewayê, veguherîne qadên bazariyê yên di navbera dewlet û şîrketan de.
Kubra Ayçîçek diyar kir ku ev lûtkeyên fermî barê karesatên avhewayê dixin ser milê gelan. Kubra Ayçîçek, got ku êdî şewat, lehî, hişkesalî û bêdebarî bûne parçeyeke jirêzê ya jiyana gel û got: “Bihayê xurekan zêde dibe, çavkaniyên avê kêm dibin, bajar û qadên çandiniyê bi betonan tên fetisandin, qadên çoltere tên parçekirin, daristan û curbicuriya biyolojîk tê tunekirin. Li dijî vê, weke kirdeyên parastina jiyanê em tên gel hev.”
Di berdewamê de Kubra Ayçîçek anî ziman ku nabe ku enerjiya nukleerî weke parçeyeke veguherîna ekolojîk were nîşandan û got ku razemeniyên enerjiyê yên rîska wan zêde hene û aboriya şer nikarin bi xwe re ewlehiyê bînin.
Kubra Ayçîçek got ku şer ne tenê jiyana mirovan lê di heman demê de pratîka eko-qirkirinê ya ax, av û hewayê jî hedef digire ye. Anî ziman ku bombebaran, cihên tên şewitandin û binesaziya tê texrîbkirin, her wiha ekosîstemê bi awayekî jêneveger parçe dikin û karesatên avhewayî kûr dikin. Kubra Ayçîçek got: “Têkoşîna edaleta avhewayê, di heman demê de mecbûre ku li dijî milîtarîzmê aştiyê jî biparêze. Pêdivî bi pêşxistina feraseteke eko-civakparêzî heye. Weke Lûtkeya Avhewayê ya Gelan, ji bo mezinkirina xeta parastina jiyanê, em her kesî vedixwînin Lûtkeya Avhewayê ya Gelan ku dê di 15-18’ê Mijdarê de bê lidarxistin.”
Seroka Giştî ya Tarim Orkam- Sen’ê Serap Baysal, jî got ku qadên cemaweriyê pêşkeşî piyasayê tên kirin û di encamê de qadên jiyanê di bin êrîşan de dimînin.
Piştî daxuyaniyê, civîna çapemeniyê weke forumê domiya.
