Ciwanê binavê Hoşmend Hemîd ku niştecihê taxa Kurdistan a bajarê Kerkukê ye û pîşeya wî mamostetî ye, piştî şehadeta fermandar Ziyad Heleb, wekî erkekî netewî û nîşana hevgirtinê ji bo Rojavayê Kurdistanê, posterê fermandar li yek ji kolanên taxa Kurdistan daliqand. Hêzên ewlehiyê yên Iraqê demildest poster rakir û ji aliyê qereqola polîsan a Erefat ve fermana girtinê ji bo wî hat dayîn û ew şandin dadgehê.
Hoşmend Hemîd ji ajansa Rojnews’ê re behsa hûrgiliyên bûyerê, biryara dadgehê kir û wiha got: “Piştî ku min posterê Şehîd Ziyad Heleb daliqand bi çend demjimêran şûnda ez hatim hişyarkirin ku ez ji taxê derkevim, ji ber ku jiyana min di xetereyê de bû. Paşê ez ji aliyê qereqola polîsan a Erefatê ve hatim girtin û bi kefaletê hatim berdan. Duh, piştî sê rûniştinên dadgehê, li gorî madeya 240 ya Yasaya Ceza ya Iraqê, 500,000 dînar cezayê pereyan li min hat birîn.
Di derbarê peyama xwe û sedema hedefgirtina wî de jî, Hoşmend Hemîd wiha axivî; “Sedema sereke ya van cezayan ji ber qelsiya hêz û pozîsyona Kurdan li Herêmên Veqetandî Di vê pêvajoyê de, ji bo têkoşîna li dijî cudakariyên wiha, yekîtiya Kurdan ji her tiştî girîngtire.
Cezakirina vî ciwanê Kurd di demekê de ye ku bi dehan wêne û posterên fermandar û kesayetiyên welatên din ên herêmê li kolan û cihên giştî yên Kerkûkê daliqandî ne. Lêbelê, daliqandina sembol û wêneyên şehîdên Kurd ji hêla rayedarên bajêr ve qedexe ye.
