Rêxistina HRWˊê bang li Konseya Mafên Mirovan a Neteweyên Yekbûyî kir ku dem û rayaya Komîteya Lêpirsînê ya Navneteweyî ya Serbixwe li ser Sûriyeyê nû bike. HRWˊê diyar kir ku divê nûkirina dem û rayayê bi piştevaniya hikumeta demkî re pêk were, wekî nîşana pabendbûna bi şefafî û reformê ye.
Lêkolînera rêxistinê Hîbe Ziyadîn destnîşan kir ku Sûriye “hê jî di qonaxeke veguhêz a hilweşiyayî de ye” û baweriya bi saziyên dewletê ji bo gelek Sûriyeyan dûr e. Hîbe destnîşan kir ku binpêkirinên giran, qetilkirina li ser bingeha nasnameyê li navenda welat û peravê, qetilkirina bêyî dadgehî û koçberkirina komî li Siwêyda û nûkirina şer li bakurê rojhilat berdewam in.
Hîbe Ziyadîn ragihand ku karê komîteya lêpirsînê di tomarkirina binpêkirinan de “pêwîstiyeke jiyanî” ye û encamên wê piştgirî dane dozên dadî yên navneteweyî. Hîbe diyar kir ku Sûriye “kêlikeke krîtîk” dijî û biryarên îro dê bandorê li mafên mirovan û aramiya welet ji bo nifşên pêş bikin.
