Dewletên Yekbûyî yên Emerîkayê (DYE) operasyonê bi navê “Hêrsa Destanî” û Îsraîl jî bi navê ‘Gurmijîna Şêr’ operasyonê dimeşîne. Êrişan 28’ê Sibatê destpê kirin û bi bersivdana Îranê re li qadeke berfireh belav bû. Bîlançoya mirovî û madî giran dibe. Şer bandora xwe li girtîgehan jî kiriye.
Malpera Dengê Binçavkiriyên Kurd û Îranê têkildarî rewşa dawî ya girtiyên li girtîgeha Evînê agahiyan belav kir.
Hate ragihandin ku dewleta Îranê biryar daye ku girtiyên li girtîgeha Evînê ji bo girtîgehên Tehranê ya Mezinî û Qumê veguhezîne.
Malperê da zanîn ku girtiyên sucên giştî dê ji bo Girtîgeha Mezin a Tehranê û girtiyên siyasî jî veguhezîne Girtîgeha Qumê, lê girtiyan li dijî vê biryarê nerazîbûn nîşan dane û ji aliyê rayedarên girtîgehê ve hatine êşkencekirin.
Sala borî jî di 24’ê Hezîranê de girtîgeha Evînê di dema şerê navbera Îsraîl û Îranê ya 12 rojî de, ji aliyê Îsraîlê ve hate bombebarankirin. Di encama êrişê de 71 kesan jiyana xwe ji dest dan û girtiyên siyasî ji bo girtîgeha mezin a Tehranê û girtîgeha Qerçekê hatibûn şandin. Dema ku dîroka veguhestina bi zorê ya girtiyan ji girtîgeha Evîn li girtîgehên Tehran û Qumê, windabûna wan û veqetandina tevahî ya girtiyan ji malbatên wan tê berçavgirtin, ev yek metirsiyek mezine li ser girtiyan.
Hêjayî gotinêye ku duh Rêxistina Mafên Mirovan a Îranê ragihand ku danê sibehê Emerîka û Îsraîlê bi muşekan Girtîgeha Evîn a li Tehranê bombebaran kir. Hat gotin ku di encama êrişê de beşek ji dîwarên girtîgehê hilweşiyane. Her wiha hatiye eşkerekirin ku ji roja despêkê ya şer ve rewşa awarte li girtîgeha Evîn hatiye ragihandin, parêzvanên girtîgehê li cihê xwe nemane, deriyên girtîgehê girtî mane û girtî di rewşek zehmet û metirsîdar de dijîn.
Girtîgeha Evînê yek ji mezintirîn girtîgehên siyasî ya Îranê ye ku li taxa Evînê ya navçeya Şehran a li bakurê Tehranê ye.
