Platforma Saziyên Demokratîk a Şirnexê, yekem pîrozbahiya Newrozê ya bajêr li beldeya Deşta Darê pêk anî. Nûnerên partiyên siyasî, rêxistinên girseyî yên demokratîk û gelek welatî beşdarî pîrozbahiyê bûn.
Li qada ku bi rengên zer, sor û kesk hatibû xemlandin, ji 7 salî heta 70 salî gelek kesan bi stranên kurdî govend gerandin. Jinên ku beşdarî pîrozbahiyê bûn, cil û bergên neteweyî yên xweserî çanda koçeriyê li xwe kirin.
Beriya çalakiyê, têkildarî pîrozbahiyên Newrozê yên ku dê li Şirnexê werin lidarxistin daxuyaniyeke çapemeniyê hat dayîn. Hevseroka Partiya DEMê ya Şirnexê Taybet Bilgi, bal kişand ser girîngiya Newrozê û bernameya pîrozbahiyê eşkere kir. Li gorî vê; pîrozbahî dê di 21ê Adarê de li Gundikê Melê, 22yê Adarê de li Cizîrê, 23yê Adarê de li navenda Şirnexê, 24ê Adarê de li Silopiyayê, 25ê Adarê de li Hezex û Qilebanê û di 26ê Adarê de jî li Elkê werin lidarxistin.
Bilgi, diyar kir ku ew ê li hemû gund û taxên Şirnexê agirê Newrozê vêxin û daxwaza azadiya fîzîkî ya Abdullah Ocalan anî ziman. Parlamenterê Partiya DEM’ê yê Şirnexê Mehmet Zekî Îrmez jî Newroza beşdaran pîroz kir û temenî kir ku Newroz bibe wesîleya azadiya Ocalan. Daxuyani bi dirûşmên “Bijî Newroz” bi dawî bû.
Piştî axaftinan, agirê Newrozê ji aliyê jinan ve hat vêxistin. Di pîrozbahiyê de ku fîşekên hewayî hatin teqandin, Koma Hezex derket ser dikê û çalakî bi govendan berdewam kir.
Li Edeneyê jî bi pêşengiya Platforma Saziyên Demokratîk, yekem agirê Newrozê yê bajêr li taxa Barbaros a navçeya Seyhanê hat vêxistin. Bi sedan kesên ku li ber nûnertiya taxê ya Partiya DEM’ê hatin cem hev, bi muzîkê govend gerandin.
Di dema vêxistina agirê Newrozê de ku ji aliyê Dayikên Aştiyê ve hat kirin, dirûşmên “Bijî Newroz”, “Bijî Serok Apo” û “Jin jiyan azadî” hatin berzkirin. Di pîrozbahiyê de bi fîşekên hewayî û konfetiyan şev hat ronîkirin.
Hevserokên Partiya DEM’ê yên navçeya Seyhanê Kismet Kaya û Sabahattin Okuducu û Hevserokê Partiya DEM’ê yê Edeneyê Seyfettin Aydemir, bang kirin ku gel beşdarî pîrozbahiya girseyî ya Newrozê bibe ku wê di 22yê Adarê de li Şanoya Vekirî ya Mîmar Sînan pêk were. Çalakî bi gerandina govendan a bi stranên Newrozê bi dawî bû.
