Mihrîcana Rojên Amara ku bi dirûşmeya “Bi Rêbertiya Azad re ber bi Neteweya Demoratîk ve“ hat lidarxistin, piştî meşek ji Xelfetiyê ber bi Amarayê ku Rêber Apo lê ji dayik bûye bi dawî bû.
Di pîrozbahiya ku bi beşdariya welatiyên ji gundên derdorê û Xelfetiyê hat lidarxistin de dirûşm hatin berzkirin û sînevîzyon hat pêşandan.
Çetîn Arkaş di bernameya pîrozbahiyê de axivî û diyar kir ku Rêber Apo di yekîtiya neteweyî ya gelê Kurd de roleke dîrokî leyst.
‘EM Ê DEV JI KOKÊN XWE BERNEDIN’
Di berdewama axaftina xwe de Çetîn Arkaş bi lêv kir ku ev erdnîgarî ji aliyê netew û baweriyan de dewlemend e û wiha dirêjî da axaftina xwe: “Rêber Apo tu car pirîm neda dijminatiya gelan. Erê Rêber Apo, Kurd û Kurdistanî ye lê di heman demê de Ereb e, Tirk e û Ermenî ye jî. Em ê dev kokên xwe bernedin. Lê em ê bi gelên din û baweriyên din re bi xwişk-biratî bijîn. Em li vir silav û rêzên xwe ji Dayika Uveyş ku temsîla xwedevandan bû dikin. Îro jin bi paradigmaya Rêber Apo ber bi azad bûnê û xwedevandiyê ve diçin.”
DEM DEMA AZADIYA RÊBER APO YE
Çetîn Arkaş bal kişand ser kriz û kaosên li Rojhilata Navîn û wiha got: “Xweşikbûna Rojhilata Navîn jî bi azadiya jinan ve pêkan e. Rêber Apo 27 sal in di bin tecride de ye. Di van 27 salan de ji bo xwe tiştek nekir. Ji bo gelê xwe, gelan û civakê xebitî. Rêber Apo rastî tecrîdeke dijwar hat û bi heqeretên mezin re rû bi rû ma. Hemû kesan heqeret dikir lê derfeta wî ya bersiv bide jî tune bû. Lê nekarîn Roja me qirêj bikin. Sedema tecrîda 27 salan jî hevaltiya me ya kêm e. Ew ji bo me şermeke mezin e. Her seata ku Rêber Apo li wê derê ye ji me re şerme. Ji me pirsin ‘Gelo hûn hemû gotinên Rêberatî dikin?’ me got. ‘Erê.’ Gotin Em ji wê re bejin em ê Kurdistanê bidin wê lê hûn ê Rêbertî ji bîr bikin.’ Me jî got; ‘Em Kurdistanê ku bê Rêber jî qebûl nakin.’ Êdî merhaleya em gehiştinê qonaxa avetina gavan e. Dê çi bibe diyar e. Divê demildest azadiya Rêber Apo pêk were. Gava yekem ew e. Divê şert û mercên Rêber Apo bên başkirin. Gava duyemîn jî azadiya Rêber Apo ye. Êdî em naxwazin tenê posterên wî bibînin. Em dixwazin wî bibînin û dengê wî bibihîsin.”
Çetîn Arkaş wiha berdewam kir: “Dayikek hebû ji me re digot; ‘Rêber Apo dê kengî were.’ Tirkmen bû. Digot, ‘Gul û beybûn dê vebin Rêber Apo jî dê were.’ Em jî dibêjin ‘Li ber xwe bide daye, li ber xwe bide. Rêber Apo dê teqez were Xelfetiyê.’ Rojbûna me hemûyan pîroz be.”
Aktivîsta TJA’yê Adalet Fîdan di pîrozbahiyê de axivî, bal kişand ser têkoşîna jinan û got, “Azadiya Rêber Apo azadiya jinan e.”
Mehmet Ocalan jî anî ziman ku ji bo azadiya fizîkî ya Rêber Apo divê rêxistinbûyîn û têkoşîn bê xurtkirin.
Bername bi koma govendê bi dawî bû.
