Di 4’ê Nîsanê de li her deverekî Mezopotamya dest diçin axê. Her tov, berû yan jî şitla ku tê çandin mîna nîşaneyên azadiya ku bi zehmetiyên mezin ve hatî bidestxistin mezin dibe û jîn dide xwezayê. Ev roj roja mizgîniya rizgariya ji tevahî koletî û kirêtiyan e. Bi vê nêzbûnê re gelê Kurdistanê û tevahî jin di rojbûna Rêber Apo de vejîna xwe dibînin û vê rojê pîroz dikin. Ji her demî jî zêdetir îsal 4’ê Nîsanê bi wateyên pir mezin tê pêşwazîkirin. Sekn û vîna Rêber Apo ya ku ji nav dîwarên stûr ên İmraliyê derketî, weke şewqekê xwe carek din gihand tevahî azadîxwazan.
Helbet ev şewqa Rêber Apo herî zêde jî li çiyayên Kurdistanê biriqî. Gerîlayên azadiyê yên ku ji silavên Rêber Apo hêzek pir mezin girtîn, îsal 4’ê Nîsanê bi kelecanek pir kûr pêşwazî dikin. Gerîlayên YJA Star û HPG’ê çawa ku di 8’ê Adarê û Newrozê de peyam û israra xwe ya di azadiya fîzîkî ya Rêber Apo de dabûn diyarkirin, ev helwesta xwe di pîrozbahiyên 4’ê Nîsanê de zêdetirîn ji kûrahî ve nîşan dan.
Li deverekî Herêmên Parastinê yên Medyayê komekî gerîlayên HPG û YJA Star’ê rojbûna Rêber Apo pîroz kirin. Gerîlayan pîrozbahiya xwe bi konseptekî dewlemed û gelek watedar dan destpêkirin û meşandin. Di destpêka pîrozbahiyê de li pêşberî kursiyek vala gerîla rûniştin û dengê Rêber Apo guhdar kirin. Gerîlayan bi vê rîtûela sembolîk daxwaz û israra xwe ya ji bo azadiya fîzîkî ya Rêber Apo dan diyarkirin.
Di berdewamiya pîrozbahiyê de gerîlayan berûyên ji daristanên çiyayê Kurdistanê berhev kirine, çandin. Wekî tê zanîn her darek berûyê yên li çiyayên Kurdistanê heta roja îro mîna parazvanekî hevgirtî gerîla parast û li hemberî tevahî êrîşên dagirkeriyê kete nava berxwedanekî. Îro gerîlayan bi boneya 4’ê Nîsanê bi çandina van berûyan parastina xwe û xwezaya Kurdistanê qahîmtir kirin. Her wiha ew dixwazin li Kurdistanekî xwezaya hîn zêdetir şîn Rêber Apo pêşwazî bikin.
Watedarî di berdewamiya pîrozbahiyê de jî domiya. Gerîlayan ‘Rojbûna Te Pîroz Be Rêber Apo’ nivîsandin û li dora wê jî bi 77 meşaleyên ku temenê Rêber Apo sembolîze dikin agir dadan. Tê zanîn ku agir remza vejînê ye. Rêber Apo jiyanek wisa ku her roj mîna xwe ji xweliyên xwe nûde avabike jiya û ev vejîn kire malê tevahî gelê Kurd û jinan. Gerîlayên azadiyê ên ku ji me hemûyan zedetir vê wateya rojbûna Rêber Apo dibînin, îro li çiyayên azad bi derfetên xwe yên sînordar pîrozbahiyên wiha lidar dixin. Di dîmenekî wiha de wate û hestekî pir bilind xwe dide der ku ew jî bêrîkirina gerîla ya ji Rêber Apo re û helwesta wan a ji bo azadiya wî ya fîzîkî ye.
