Piştî êrişên li dibistanên li Sêwereg û Mereşê ku di encamê de 9 xwendekar û mamosteyekî jiyana xwe ji dest dan û bi dehan kes birîndar bûn, nîqaş dewam dikin. Sekretera Jinê ya Navendî ya Egîtîm-Senê Sîmge Yardim anî ziman ku bûyerên qewimîne yekane nîne, lê encamek ji polîtîkayên perwerdeyê yên bi salan e.
Sîmge Yardim diyar kir ku bersiv ji pirsa “Civak çawa hat vê astê?” divê û destnîşan kir ku bûyerên qewimîne nabe ku tenê weke qelsiyeke ewlehiyê bê dîtin, ev yek işaretê bi krîzeke sîstemî ya kûr dike. Yardim ragihand ku ev trajedî ji nişka ve derneket holê û diyar kir ku polîtîkayên demdirêj gav bi gav zemîn ji tundiyê re amade kir.
Yardim got, “Eşkere bû ku rewşên bi vî rengî biqewimin” û destnîşan kir ku desthilatdariya siyasî mercên ku dibin sedema tundiyê demeke dirêj e ji nedîtî ve tê, yan jî bi rengekî neyekser rewa dike. Yardim anî ziman ku perwerde ji bo hemû desthilatdariyan amûreke îdeolojîk e û diyar kir ku di dema dawî de Wezareta Perwerdeyê ev amûr bi xurtî bi kar anî. Yardim destnîşan kir ku bi guhertinên li mufredatê, protokolên hatin îmzekirin, kiryarên pîşeyî û binpêkirina mafê perwerdeyê re zarokan xwe di nava sîstema perwerdeyê de hêja nedîtin.
‘LI CIHÊ KU NASNAME TINE BÊ HESIBANDIN WÊ TUNDÎ DERKEVE PÊŞ’
Sîmge Yardim bi bîr xist ku tundiya li dibistanan tenê êrişên fîzîkî nîne, li pişt vê yekê redkirina nasname û çandê heye. Yardim ragihand ku nasname, çand û zimanê zarokan tine têne hesibandin, mafê perwerdeya bi zimanê dayikê nayê naskirin û got, ev rewş ji ber xwe ve derneketiye holê, encamek ji danheviyekê ye.
Yardim bal kişand ser bûyerên bêhêvîtî û xwekuştinê yên li nava ciwanan û diyar kir ku polîtîkayên asîmîlasyonê û bêçaretiya zarok ber bi wê ve têne dehfdan, ev pêvajo girantir kiriye. Yardim got, “Divê em li wê pergalê bipirsin ku zarok dike kujer û ji bo guhertina wê jî em demokrasiyê ava bikin.”
LI SÊWEREG Û MEREŞÊ FIKARA ZÊDE Û TRAVMA
Sîmge Yardim anî ziman ku wan li herêmên êriş lê hatin kirin lêkolîn kirin û bi taybetî li Sêweregê di nava xwendekar û gel de fikareke cidî ya li ser ewlekariyê heye. Yardim destnîşan kir ku ev rewş divê weke travmayekê bê dîtin û ne tenê li van herdu bajaran divê li hemû herêman ji bo xwendekaran mekanîzmayên piştevaniya civakî bikevin dewrê.
