“Stichting Nationaal Heksenmonument” a ku li Hollandayê xebatan dimeşîne, ragihand ku ji bo zindîhîştina bîranîna jinên ku li Ewropayê bi sûcdarkirina pîrheboktiyê hatine îdamkirin, dê abîdeyeke neteweyî were çêkirin.
Li gorî agahiyên ku weqfê dane; li seranserê Ewropayê di navbera sedsalên 15 û 17’an de bi sûcdarkirina “pîrheboktiyê” nêzî 50 heta 60 hezar kes hatine kuştin. Nêzî sê parên çar parên qurbaniyan ji jinan pêk dihatin.
ABÎDE DÊ LI BAJARÊ ROERMONDÊ WERE ÇÊKIRIN
Hate diyarkirin ku tê plansazkirin ku abîde heta dawiya salê li bajarê Roermondê yê li başûrê welat were temamkirin.
Li gorî çavkaniyên herêmî, ev bajar wekî yek ji wan cihan tê naskirin ku li Hollandayê ji ber sûcdarkirina pîrheboktiyê herî zêde mirov lê hatine dadgehkirin û îdamkirin. Tê tomarkirin ku di sala 1613’an de tenê li Roermondê 64 kes bi sûcdarkirina pîrheboktiyê hatine şewitandin.
Sêwirana abîdeya ku tê plansazkirin bilindahiya wê nêzî 2,5 metreyan be, ji hunermend Marieke van der Meer re hat spartin.
ŞÊWAZÊ DÎROKÎ YÊ DIJMINATIYA LI HEMBERÎ JINÊ
Yek ji rêveberên projeyê, derhênera şanoyê Manja Bedner anî ziman ku nêçîra pîrhebokan ne tenê rûdaneke dîrokî ye, lê şêwazekî tundiya sîstematîk a li ser jinê ye.
Bedner diyar kir ku di rabirdûyê de jin ji tirsa şewitandinê neçar mane ku tevgerên xwe biguherînin û bandorên vê yên civakî heta roja me ya îro jî berdewam dikin.
Di daxuyaniya weqfê de jî hat destnîşankirin ku nêçîra pîrhebokan, yek ji şêwazên dîrokî yên qirkirina jinê ye.
