Di pêvajoya “Aştî û Civaka Demokratîk” ku bi banga 27’ê Sibatê ya Rêber Apo destpê kir, li gel sala ku di ser re derbas bûye hîn jî dewletê gaveke şênber neavêtiye. Ji bo pêvajo bi rê ve biçe li nava raya giştî tê xwestin ku tecrîda li Îmraliyê bê rakirin, “Mafê Hêviyê” bi cih bê anîn û azadiya fîzîkî ya Rêber Apo pêk were.
Xelkê Amedê rewşa heyî ya pêvajoyê, rewşa xitimandî ji ANF’ê re nirxand û destnîşan kir ku ji bo çareseriyeke mayinde divê dewlet gavê biavêje.
‘EM LI BENDÊ NE KU DEWLET GAVÊ BIAVÊJE’
Fatma Adak ragihand ku aliyê Kurd berpirsyariya xwe bi cih anî, lê belê dewletê hîn jî gaveke şênber neavêtiye û got, “Pêvajoyek heye lê belê gavên rast nayên avêtin. PKK’ê xwe fesix kir, hemû gavên jê dihate xwestin avêt, lê belê dewlet hîn jî gavekê neavêje. Em niha li benda wê gavê ne. Sedema kombûna me ya li vir û meşa me jî ev e. Eger Rêber Apo pêvajoyê li derve bimeşîne wê encamên hîn xurt bi xwe re bîne. Eger Rêberê me li derve be wê pêvajoyê bi xurtî bimeşîne. Haya me ji vê heye û em vê dixwazin. Em dixwazin aştî pêk were. Li girtîgehan gelek girtî hene; mirovên ku sih sal in girtî ne hene, berdana van li pey hev çareserî nîne. Ji xwe mafê wan ê bingehîn e. Em li bendê ne ku gavên hîn mayinde û cidî bêne avêtin.”
‘AŞTÎ WÊ PÊŞÎ LI TIRKIYEYÊ VEKE’
Mehmet Bayik jî diyar kir ku pêvajo ji aliyê dewletê ve hatiye xitimandin û anî ziman ku Rêber Apo hewl dide bi tena serê xwe pêvajoyê bi pêş ve bibe. Mehmet Bayik got, “Ne bawer im ku dewlet di vê pêvajoyê de bi rastî jî aştiyê dixwaze. Halbûkî avakirina aştiyeke mezin li Tirkiyeyê ji bo her kesî rêya herî baş e. Bi taybetî Tirkiye ji aliyê aborî ve di rewşeke gelekî zehmet de ye. Eger aştî pêk were Tirkiye wê ji her alî ve xurt bibe. Yekîtiya Kurd û Tirkan wê li herêmê jî encamên girîng bi xwe re bîne. Rêberetî ji bo paşeroj û hebûna Kurdan bi berpirsyariyeke girîng radibe. Ji ber vê yekê em ji Rêbertî bawer dikin. Em gotina wî ji xwe re dikin esas û bawer dikin ku wê aştiyeke bi rûmet ava bike.”
‘PÊVAJO XITIMÎ YE, GEL LI BENDA GAVA ŞÊNBER E’
Şevîn Tûna jî bi bîr xist ku di çarçoveya pêvajoyê de li Meclîsê komîsyonek ava bû, bi gelek saziyan re hevdîtin hatin kirin û got, lê belê di nava dema derbasbûyî de pêşketineke şênber çênebû.
Şevîn Tûna got, “Komîsyonê rapora xwe amade kir, lê belê pêvajo xitimî. Ji ber vê yekê em îro li Amedê tevlî meşê bûn. Bendewariya me ya bingehîn aştî ye. Em naxwazin êdî li van bajaran mirov bimirin. Em dixwazin li ser bingeha welatîbûna wekhev gel bi hev re bijîn. Em dixwazin demokrasî, xwişk û biratî û yekîtî li vê xakê serwer be.
Pêkhatina azadiya fîzîkî ya Birêz Abdullah Ocalan wê samîmiyetê bide pêvajoyê. Eger bi rastî jî gavên pêwîst bêne avêtin, wê gelê Kurd jî bibîne ku pêvajoyeke demokratîk bi pêş ve diçe. Ev yek di heman demê de wê bê wateya sekneke şênber a hikumetê.”
