Li gorî nûçeya Ajansa Mezopotamyayê, piştî ku pirtûka berbehs li qada hevpar a girtîgehê hatiye dîtin, derheqê Kiymet Ilgazê de lêpirsîn hatiye destpêkirin. Piştî lêkolînan eşkere bû ku derbarê pirtûkê de tu biryareke qedexeyê tune ye û dozgeriyê di 5’ê Tîrmeha 2024’an de biryara neşopandinê daye.
Tevî vê yekê jî derbarê Kiymet Ilgazê de bi hinceta “anîna tiştên qedexekirî nav girtîgehê” lêpirsînek hat destpêkirin. Îdîaname ji aliyê Dadgeha Ceza ya Asliye ya 31’emîn a Bakirkoyê ve hat qebûlkirin. Di dema darizandinê de Midûriyeta Polîsan a Stenbolê nirxandinên xwe yên derbarê lêpirsînê de pêşkêşî dadgehê kir. Her çend polîsan diyar kir ku ji bo pirtûkê biryara desteserkirinê tune ye û ji ber vê yekê ew sûc pêk nayê, wan îdia kir ku pirtûk ji bo “perwerdehiya rêxistinî” hatiye bikaranîn. Lê belê, polîsan tu delîlên berbiçav pêşkêş nekirin da ku vê îdiayê piştrast bikin.
Tevî biryara berê ya betalkirina tohmetan û nebûna delîlên berbiçav ên polîsan, dadgehê bi tohmeta anîna tiştên qedexekirî nav girtîgehê salek cezayê girtîgehê li Kiymet Ilgazê birî.
Kiymet Ilgazê û parêzerên wê li dijî cezayê îtîraz kirin. Lê belê, dadgeha îstînafê tevî îtîrazê biryarê pejirand. Piştî vê yekê, Kiymet Ilgazê serî li Dadgeha Destûra Bingehîn (AYM) da. AYM’ê hîn biryar nedaye.
Kiymet Ilgazê, mesele ragihand Parlamentera Partiya Wekhevî û Demokrasiyê ya Gelan (DEM Partî) ya Bedlîsê Semra Çaglarê. Semra Çaglarê derbarê mijarê de serî li Komîteya Lêpirsîna Mafên Mirovan (ÎHİK) ya Meclisê da.
Di serlêdanê de hat xwestin ku pêkanînên ji bo pirtûk û weşanan divê di çarçoveya standardên mafên mirovan de bên nirxandin û bê lêkolînkirin ku rewşa navborî azadiya fikr û ramanê asteng dike yan na.
