Hevserokatiya Konseya Rêveber a KCK’ê bi wsîleya salvegera damezrandina YNK’ê peyameke pîrozbahiyê weşand.
Peyama KCK’ê bi vî rengî ye:
“Birêz Serokê Yekitiya Nîştimanî ya Kurdistanê Bafil Celal Talabanî
Birêz Endamên Mekteba Siyasî û Encûmena Bilind a Siyasî;
Bi boneya 51’emîn salvegera damezrandina Yekitiya Nîştimanî ya Kurdistanê, em pîrozbahiyên xwe yên germ arasteyî we yên birêz, hemû kadro, endam û alîgirên Yekitiyê dikin, tendurustiya baş û serketinê ji bo we dixwazin.
Damezrandina Yekitiya Nîştimanî ya Kurdistanê xwedî giringiyeke dîrokî ye. Di demekê de ku li Başûrê Kurdistanê bê hêvîtî hebû, Yekitiya Nîştimanî ya Kurdistanê bi pêxistina şoreşa nû û ji nû ve destpêkirina têkoşîn û berxwedana li dijî rejîma faşîst a Baasê, careke din ji bo gelê Kurdistanê bû tîrêja hêviyê. Ji wê serdemê heta niha Yekitiya Nîştimanî ya Kurdistanê, di misogerkirina destketiyên neteweyî û demokratîk de li Başûrê Kurdistanê rolek girîng lîstiye.
Her wiha Yekitiya Nîştimanî ya Kurdistanê, bi pêşengiya Serok Mam Celal Talebanî, di hevkarî û piştgiriya ji bo xebat û têkoşîna li beşên din ên Kurdistanê de û her wiha di hewldanên ji bo çareseriya aştiyane ya pirsa Kurd de, xwedî rol û bandor bûye. Pêwendiya hevaltî û dostaniyê ya di navbera Serok Mam Celal, Rêber Apo û Mamoste Îbrahîm Ehmed de, ispata vê rastiye ye. Ev pêwendî di heman demê de havênê yekitiya neteweyî û demokratîk a di navbera her çar parçeyên Kurdistanê de ye.
Em di wê baweriyê de ne ku weke wefadariyek ji bo vê mîrata dîrokî, pêwîst dike ku em hîn zêdetir ji bo yekitiya neteweyî, bi beşdariya hemû hêz û aliyên siyasî yên li seranserê Kurdistanê, têkoşîn û xebatê xurtir bikin.
Careke din, em vê rojê li we yên birêz, malbatên şehîdên serbilind û hemû gelê Kurdistanê pîroz dikin, serê rêz û hurmetê li ber şehîdan ditewînin û hêvî dikin ku hûn serketî û serfiraz bin.”
