Di daxuyaniya Komîsyona Gel û Baweriyan a DEM Partiyê de hate gotin, “Rojên dawî li ser hin notên hevdîtinê yên bi îdîaya ku ‘yên Birêz Abdullah Ocalan e’ hatin servîskirin, gotina ‘Tifaqa Yavûs Sûltan Selîm-Îdrîs-î Bîtlîsî’ tê bikaranîn û li ser Elewîtiyê nîqaşeke nû tê meşandin. Weke ku beriya niha jî Heyeta me ya Îmraliyê û partiya me ragihand, nirxandineke Birêz Ocalan a bi vî rengî nîne.
Nêzîkatiya ‘Elewî di dilê vê pêvajoyê de ne’ ya Birêz Ocalan bi şênberî radixe pêş çavan ku ew Elewiyan weke yek ji hêmanên eslî û damezrîner ên civaka demokratîk û aştiyê dibîne. Her cûre nêzîkatiya ku hewl dide Elewiyan li derveyî Pêvajoya Aştî û Civaka Demokratîk bihêle li dijî vê perspektîfê ye.
Hişê dîrokî û têkoşîna azadî, demokrasî û welatîbûna wekhev a Elewiyan ji bo avakirina aştiya civakî ya mayinde gelekî hêja ye. Nayê qebûlkirin ku ev hesasiyet weke amûreke berevajîkirinê ya siyasî bê bikaranîn û Elewî weke dijberê pêvajoya aştiyê bêne nîşandan.
Elewîtî xwedî hişekî xurt ê bawerî û civakî ye ku lêgerîna li heqîqetê, lêpirsînê, aqil, edalet, rizatî û wekheviyê ji xwe re dike esas. Civaka Elewî xwedî wê îradeyê ye ku gotinên bi navê wan têne gotin çiqasî li heqîqetê yan jî rastiya dîrokî ya Elewîtiyê tê yan na bipîve.
Bi navê Komîsyona Gel û Baweriyan a DEM Partiyê em qebûl nakin ku hesasiyetên Elewiyan weke amûrekê bêne bikaranîn. Pêvajoya Aştî û Civaka Demokratîk daxwaza wê yekê dike ku Elewî bi rengekî azad bi baweriya xwe bijîn û îbadetê bikin. Mafê welatîbûna wekhev hêmaneke bingehîn a demokratîkbûnê ye ku dest jê nayê berdan. Lewma em careke din destnîşan dikin ku Elewî yek ji hêmanên damezrîner ên aştiya mayinde û civaka demokratîk e.”
