Di sala 1992’yan de şerê ku di navbera PKK’ê, dewleta Tirk û PDK’ê de hatibû destpêkirin, bi armanca tinekirina xeta rast a azadiya gelê Kurd bû. Lê belê xeta berxwedanê ya ku bi sekna jina azad hat raberkirin, ev plan vala derxist. Bêrîtan Hêvî di sala 1992’yan de bi sekneke bêhempa li hemberî êrîşên hêzên hevkar PDK û dewleta Tirk li ber xwe da. Heya gulaya xwe ya dawî şer kir; ji bo ku nekeve destê dijmin çeka xwe şikand û xwe ji zinaran avêt. Ev sekin, di heman demê de vekirina rûpelekî nû ya dîroka jina azad bû. Bi şehadeta Bêrîtan Hêvî re Rêber Apo bingehê artêşbûna jin da destpêkirin. Gerîlayên HPJ’ê, bi wesîleya salvegera şehadeta Bêrîtan Hêvî bi merasîmekê leşkerî ew bibîr anîn.
Di merasîma leşekerî ya bîranîna şehîd Bêrîtan Hêvî de fermandara HPJ’ê Rojîn Fesîh axivî û got em careke din li vir soza pêkanîna xewin û xeyalê şehîdan dubare dikin û wiha domand: “ 34. salvegera şehadeta fermandar heval Bêrîtan e. Meha cotmehê meha fedaytî, qehremantî, pêşengtî û egîdbûna jina Kurd e. Di şexsê heval Bêrîtan de Gurbet Ellî Ersoz, Arîn Mîrkan, Zîlan Serdeşt, Asya Elî, Rojger Hêlîn û hemû şehîdên şoreşê bi minnet û rêzdarî bibîrtînin û soza pêkanîna xewn û xeyalê wan didin. Heval Bêrîtan bi sekna xwe ya fedayî û bi bîryardariya xwe ve heta dawiyê şer kir û li hember îxanetkar û teslîmiyet xeta berxwedanê hilbijart. Heval Bêrîtan bû rûmeta azadiyê û sembola artêşbûna jin. Di dîrokê de û di Kurdistanê de bi fikir û ramanê Rêber Apo ve cara yekemîn artêşbûna jin hat avakirin.”
‘LI ZÎNDANÊN ÎRANÊ BERXWEDANIYEKE BÊHEMPA TÊ MEŞANDIN’
Rojîn Fesîh di nava axavtinên xwe de balkişand ser tekoşîn û berxwedaniya jina Kurd û wiha pêda çû: “Her çiqas jin di nava artêşa dewletê de jî cihê xwe bigire, lê ji ber ew artêş bi fikirê zilamê serdest hatiye avakirin, keda jinan her tim li bin siya wî de maye û nehatiye dîtin. Artêşbûna jin Kurd ji bo maf û ji bo edalet hatiye avakirin û bi tenê di nava çar parçeyên Kurdistanê de sînordar nema. Jina Kurd di nava Rojava de bi pêşengtiya YPJ, di nava Şengalê de bi pêşengtiya YJŞ û li Rojhilatê Kurdistanê de HPJ xwe bi rêxistin dike û xwedî li mafê hemû jinan derdikeve. Di Rojhilatê Kurdistanê de bi pêşengtiya Aryen Arê, Zîlan Pepûle û Şêrîn Elemhûlî ev têkoşîn dimeşe li ser xeta berxwedaniya rêheval Bêrîtan. Di warê bîrdozî û siyasî de xwe bi rêxistin dike û pêş dixe. Di nava zîndanên Îranê de heval Werîşa Muradî û Zeynep Celaliyan û Pexşan Ezîzî li dijî teslîmiyetê berxwedaniyeke bêhempa didin meşandin. Di roja îro de jî rejîma Îranê herî zêde li ser jin êrîşan pêk tîne. Dixweze bê îrade bike. Hukmê îdamê, tacîz û tecawz jî gelek zêde bûye di nava Îranê de. Ji bo ku civakê bê deng bike û nehêle jin serê xwe rabike dubare hukmê îdamê li Werîşa Muradî birîn. Hemû jinan li ser bingeha şoreşa Jin Jiyan Azadî xwe bi rêxistin kirine û bûne xwedî nasname.”
‘EM Ê DI ÇARÇOVEYA PARASTINA REWA DE XWE Û CIVAKA XWE BIPARÊZIN’
Fesîh bi van gotinan dawî li axaftina xwe anî: “Rejîma îranê di vê pêvajoya dawî de li ser hêzên Rojhilatê Kurdistan êrîşên xwe dane destpêkirin. Dixweze gerîlayên Rojhilatê Kurdistanê di hundir de tengav bike û qadê lê tang bike. Îran bi çekên xwe yê giran û dironên xwe kuj êrîşên xwe berfireh dike. Berê jî hatibû şiyarkirin rejîma Îranê darvekirinê li ser jinên Kurd û li ser jinên siyasî nede sekinandin, êrîşên xwe bidomîne li ser civakê û oparasiyonên xwe li ser gerîlayan nede sekinandin em ê di çarçoveya parastina rewa de parastina xwe û civaka xwe bikin.”
Gerîlayên HPJ’ê piştî ku merasîma leşkerî bi dawî bû, berê xwe dan cihê moralê û li wê derê stran gotin û govend gerandin.
