Nivîskar Ayşe Berktay ku di pêvajoyên çareseriyê yên beriya niha de beşdarî gelek karên aştiyê bû û li gelek bajaran bi jinan re civiya, Pêvajoya Aştî û Civaka Demokratîk û rola ku divê jin di vê pêvajoyê de pê rabin ji ANF’ê re nirxand.
Ayşe Berktay karên tevgerên jinan ên pêvajoya çareseriyê ya salên 2013-2015’an bi bîr xist û anî ziman ku jin ne weke piştevanê aştiyê, lê belê weke hêza yekser a mekanîzmayên biryardanê bêne dîtin.
Di vê çarçoveyê de bal kişand ser girîngiya civakîbûna aştiyê û ragihand ku nabe pêvajo tenê weke hevdîtinên navbera aktorên siyasî were dîtin. Ayşe Berktay destnîşan kir ku tevgera azadiyê ya Kurd, bi taybetî jî jin wê rê nedin nêzîkatiyeke bi vî rengî û anî ziman ku ji bo çareseriya demokratîk divê îradeya rêxistinbûyî ya jinan bê destnîşankirin.
Ayşe Berktay anî ziman ku pêvajoya çareseriyê ya 2013-2015’an ji ber xwe ve destpê nekir, divê weke parçeyek ji lêgerîna çareseriya siyasî ya pirsgirêka Kurd bê nirxandin ku di sala 2009’an de kete rojevê.
Nivîskar Ayşe Berktay diyar kir ku bi destpêkirina serdanên heyetê yên li Îmraliyê re weke tevgera jinên Kurd ew beşdarî nava heyeteke jinan bû û ji bo bi jinên Tirkiyeyî re îrade û gotineke hevpar biafirîne Meclîsa Azadiyê ya Jinan (KOM) ava kirin.
Ayşe Berktay ragihand ku rêxistinên jinan bi rêya komîsyonên ava kirin li ser pêvajoya aştiyê rapor amade kirin, li bajarên cuda kar kirin û got, “Bi komîsyon û raporên xwe hewl dan ku rêxistiniyekê ava bikin ku îradeya wan nîşan bide. Di vê demê de KOM bê navber xebitî.
Jinan bi komîsyonên şopandinê û komîsyonên heqîqetê li Lice, Gimgim, Dersim, Pirsûs û sînorê Kobanê timî xebitîn. Girîngî û pêwîstiya zêdebûnê xwe nîşan da.”
‘DIVÊ JIN DI NAVA MEKANÎZMAYÊN BIRYARDANÊ DE BIN’
Ayşe Berktay anî ziman ku bilindkirina daxwaza aştiyê û piştgiriya bi pêvajoyê re girîng e, lê belê ev bi tena serê xwe têrê nake û destnîşan kir ku divê jin bi rengekî yekser beşdarî nîqaşên li ser şêweyê avakirina aştiyê û mekanîzmayên biryardanê bibin.
Li ser vê bingehê destnîşan kir ku divê jin bi îradeya xwe ya civakî ya rêxistinbûyî beşdarî pêvajoyên biryardanê bibin û got, “Eger çareserî wê demokratîk be, jinên ku kedê didin, jiyanê ava dikin, jinûve hildiberînin û şaneya esasî ya civakîbûnê ye, bêguman divê weke aktorekî bi rengekî yekser beşdar bibin. Mercê esasî yê demokratîkbûna pêvajoyê û bicihhatina wê ev e. Lê belê pirsa ‘Ew tevlîbûna yekser wê çawa be?’ girîng e. Ya ku guherînê û civakê bike parçeyek ji pêvajoyê tevlîbûna hin jinên pispor tenê nîne. Divê jin civakê bixe nava tegerê û weke hebûneyeke ku nikare bê înkarkirin vîna xwe nîşan bide. Ragihandina vê îradeyê bi serê xwe rêxistiniyek e.”
‘NABE KU PÊVAJO TENÊ WEKE HEVDÎTINÊN NAVBERA AKTORÊN SIYASÎ BÊ DÎTIN’
Ayşe Berktay diyar kir ku Pêvajoya Aştî û Civaka Demokratîk nabe ku tenê weke hevdîtinên navbera aktorên siyasî bê dîtin û got, ji bo vê pêwîstî bi afirandina îradeyeke rêxistinbûyî û hêzeke civakî heye.
Nivîskar Ayşe Berktay anî ziman ku beşdariya li mekanîzmayên biryardanê girîng e, lê belê bicihanîna biryaran, kontrolkirina wan û çareserkirina pirsgirêkên derkevin holê têkoşîneke kolektîf ferz dike.
