Înîsiyatîfa Yekîtiya Demokratîk li eywanek dawetê ya li navçeya Qoserê ya Mêrdînê Komxebata Aştî û Diyalogê li dar xist. Hevberdevka Înîsiyatîfê Gulcan Kaçmaz Sagyîgît, Hevşaredarê Bajarê Mezin ê Mêrdînê Ahmet Turk ku qeyim tayînî şûna wî hatiye kirin, endamên sekreteryaya Înîsiyatîfê û gelek rûspiyên herêmê û gelek kes beşdarî komxebatê bûn. Beriya komxebat dest pê bike ji bo cangoriyên têkoşîna azadiyê rêz hate girtin.
Di destpêka komxebatê de Hevşaredarê Bajarê Mezin ê Mêrdînê Ahmet Turk axivî û destnîşan kir ku ew di pêvajoyek nû re derbas dibin, divê gelê Kurd di vê pêvajoya nû de xwe di her qadê de bi rêxistin bike û wiha axivî: “Yekîtî bi biratî û hevgirtinê pêk tê û divê gelê me vê yekîtiyê ava bike. Di dîrokê de sed salan carekî firsendek dikeve destê mirov û divê em bi vê hişmendiyê nêzî pêvajoyê bibin.”
‘BIRÊZ OCALAN RÊ LI BER DEMOKRASIYÊ VEKIR’
Ahmet Turk bal kişand ser girîngiya pêvajoya Aştî û Civaka Demokratîk a ji aliyê Rêberê Gelê Kurd Abdullah Ocalan ve hatiye destpêkirin û axaftina xwe wiha domand: “Birêz Ocalan bi destpêkirina pêvajoyê rê li ber demokrasiyê vekir. Divê gelê me, saziyên civakî, rûspiyên gelê me bi awayek xurt piştgiriyê bidin vê pêvajoyê. Dema me piştgirî da û yekîtiya xwe ava kir, destê me wê bi hêz be. Heta em tifaqa xwe saz nekin, ev yek dê zerarê bide pêvajoyê.”
‘PÊVAJO HÊDÎ DIMEŞE DIVÊ LEZ BIKIN’
Ahmet Turk destnîşan kir ku pêvajo bi giranî dimeşe û axaftina xwe wiha berdewam kir: “Em nabêjin pêvajo xetimiye lê gelekî giran dimeşe. Qanûna çarçoveyê ku hatiye amadekirin û nêrînên li ser vê berdewam dikin. Em dizanin wê ev çarçove qanûn bi birêz Ocalan re were parvekirin û piştre were rojeva Meclîsê. Divê ev qanûna çarçoveyê berfireh be û her alî bixe nava xwe. Her wiha divê xizmetê ji aştiyê re bike. Lê divê em baş bizanibin ku aştî wê bi piştgiriya civakê pêk were.”
‘DIVÊ EM RÊXISTINBÛYÎNA XWE XURT BIKIN’
Ahmet Turk herî dawî hevdîtina xwe ya bi Abdullah Ocalan re bi bîr xist û axaftina xwe wiha bi dawî kir: “Dema em çûn cem birêz Ocalan pirsa gel kir û got, ‘gel çawa difikire, çawa nêzîk pêvajoyê dibe’. Ji vir jî divê em baş bizanibin ku divê gel pirsgirêkên xwe bi xwe çareser bike û yekîtiya xwe ava bike. Divê em rêxistinbûyîna xwe xurt bikin da ku em bikaribin zû mudaxileyî pirsgirêkan bikin.”
‘DIVÊ EM PIRSGIRÊKÊKÊN XWE YÊN NAVXWEYÎ ÇARESER BIKIN’
Piştî Ahmet Turk, Hevberdevka Înîsiyatîfê Gulcan Kaçmaz Sayyîgît axivî û anî ziman ku li erdnîgariya Kurd lê dijî her tim rastî êrişên çandî, zimanî, civakî hatiye û wiha axivî: “Gelê Kurd di erdnigariya xwe de ji bilî êrişên çekdarî rastî êrişên civakî, çandî û zimanî hatiye. Bi van êrişan me gelek berdêl dan û armanc ew bû ku em ji nirxên xwe dûr bikevin. Îro jî êrişên çandî, zimanî û civakî berdewam dikin û divê em li dijî van êrişan xurt bin. Bi vî awayî em dikarin bi yekîtiyê ava bikin. Divê êdî pirsgirêkên xwe yên navxweyî em bi xwe çareser bikin.”
Piştî axaftina Gulcan Kaçmaz Sayyîgît komxebat bi nêrîn û pirsên beşdaran bi dawî bû.
