Li gorî televîzyona dewletê ya Îranê, tûra duyemîn a hevdîtinên ‘’nerasterast’’ wê roja Sêşemê dest pê bike.
Rêveberiya Tehranê diyar kir ku pêvajoya hevdîtinên nû di destpêka meha Sibatê de piştî hevdîtinên ku ji nû ve li Ummanê hatin destpêkirin, dest pê kiriye. Hevdîtin, di dema ku gefa mudaxeleya leşkerî ya DYE’yê rojevê de ye tên birêvebirin.
Televîzyona dewletê ya Îranê li ser hesabê xwe yê Telegramê got: ‘’Wezîrê Karên Derve, ji bo beşdarî tûra duyemîn a muzakereyên nukleerî li gel delegasyoneke ku ji heyeteke dîplomatîk û pisporan pêk tê, gihîşt Cenevreyê.’’
Tê payîn ku Arakçî di çarçoveya hevdîtinên li Cenevreyê de bi hempîşeyên xwe yên Swîsreyî û Ummanî û Dîrektorê Giştî yê Ajansa Enerjiya Atomê ya Navneteweyî (UAEA) Rafael Grossi re hevdîtinan pêk bîne.
Her wiha Koşka Spî jî diyar kir ku wê vê hefteyê Steve Witkoff ê nûnerê Taybet ê Serokê DYE’yê Donald Trump û zavayê Trump, Jared Kushner jî li Cenevreyê bin. Tê plankirin ku heyeta DYE’yê bi nûnerên Rûsya û Ûkraynayê re jî hevdîtinan pêk bînin.
Trump, piştî ku xwepêşandanên di meha Çileyê de yên li Îranê yên berfireh ji aliyê hêzên ewlehiyê ve bi xwînî hatin çewisandin, gefa xwe leşkerî gelek caran anîbû ziman lê belê diyar kiribû ku deriyê çareseriya dîplomatîk jî vekirî ye. Di vê çarçoveyê de bi taybetî bernameya nukleerî ya Îranê di rojevê de ye.
Yekem rûniştina muzakereya di navbera Îran û DYE’yê de di 6’ê Sibatê de li Maskat a paytextê Ummanê hatibû kirin. Hevdîtinên beriya niha jî ji ber şerê di navbera Îranê û Îsraîlê yê Hezîrana 2026’an de qut bûbûn. Di wê serdemê de DYE’yê jî tesîsên nukleer yên Îranê bombebaran kiribûn.
