Ji bo serokwekîlê Meclîsê û Endamê Heyeta Îmraliyê yê Partiya Demokrasî û Wekheviyê ya Gelan (DEM Partî) Sirri Sureyya Onder li salona Meclîsê taziye hate danîn.
Li ser maseyekê wêneyê Onder û qurnefîl hate danîn û lênûskeke ji bo bîranînê hate bicihkirin.
Serokê Meclîsê Nûman Kûrtûlmûş, Serokê Giştî yê MHP’ê Devlet Bahçelî, Serokwekîlê Meclîsê yê ji Partiya Gel a Komarê (CHP) Mûrat Emîr û heyeta pê re, Serokê Giştî yê Partiya Gelecekê Ahmet Davûtoglû û Serokê Giştî yê Partiya Saadetê Mahmût Arikan jî di nav de gelek wekîlan serdana taziyeyê kirin.
Birayê Onder Alî Onder, Hevserokên Giştî yên DEM Partiyê Tulay Hatîmogûllari û Tûncer Bakirhan, Endama Heyeta Îmraliyê Pervîn Bûldan û parlamenterên DEM Partiyê pêşwaziya serdana kirin.
Mûrat Emîr ê CHP’yî sersaxî xwest û got, “Me gelekî ji wî hez kir û gelekî jê razî bûn. Cihê wî bihuşt be.”
Tulay Hatîmogûllari spasiya CHP’iyan kir û got, “Ne tenê ji bo DEM Partî û parlamentê, ji bo Tirkiyeyê, ji bo tevahiya welêt windahiyek mezin bû.”
Tulay Hatîmogûllari got, “Ji bo aştiyê gelekî xebitî. Weke Tirkekî her timî piştgirî da gelê Kurd.”
Davûtoglû jî li merasîmê sersaxî ji malbata Onder, DEM Partiyê re xwest û got, “Onder ji bo welatê xwe, ji bo gelê xwe, hewl da ya rast bike.”
Nûman Kûrtûlmûş jî got, “Tirkiye wê timî wî weke fîgurekî alîgirê aştiyê, xwişk û biratiyê bi bîr bîne. Kesayetekî welê bû ku bi entelektuelî, dost, hevaltiyê dihate naskirin.”
Kûrtûlmûş û Bahçelî piştî demekê dawî li serdana xwe anîn.
