Gaziyê şer Qehreman Til Temir di pêvajoya ku çeteyên DAÎŞ’ê êrîşî bajar û gelên Bakur û Rojhilatê Sûriyeyê dikirin, ji bo parastina nirxên mirovatiyê tevlî şerê li hember çeteyan dibe. Qehreman di şerekî li hember çeteyên DAÎŞ’ê de birîndar dibe. Gaziyê şer Qehreman Til Temir têkildarî komploya navneteweyî ya 15’ê Sibatê axivî.
Qehreman Til Temir ê di destpêka axaftina xwe de komploya 15’ê Sibatê şermezar kir û got: “Dema komploya 1999’an çêbû ez zarok bûm. Lê belê ji rewşa malbatê û derdorê min fêm kir ku tiştekî nexweş çêbûye. Piştre li kolanan bi sedan mirov kom dibûn û dest bi dirûşman kirin. Piştî wê ez pê hisiyam ku Rêber Apo bi komployekê dîl hatiye girtin. Gel pir bi hêrs û xemgîn bû. Ji ber gelê Kurd ji dîrokê dizane dema serok û pêşengên wan hatine girtin û qetilkirin, rêxistinbûn û têkoşîna wan jî bi dawî bûye û li dû wê dagirkeran dest bi qirkirin û komkujiyan kirine. Gelê Kurd nedixwest dîrok careke din dubare bike. Lewma bi girseyî bertekên xwe nîşan didan.”
Gaziyê şer destnîşan kir ku li herêma wan dû komployê êdî di nav ciwanan de behsa tolgirtinê dihat kirin û wiha axivî: “Bi serhildanên gel ên li hember komployê re bi taybet di nav ciwanan de serwextbûneke neteweyî pêş ket. Bi dehan ciwanên min nas dikirin, ji bo tevlî Tevgera Azadiyê bibin berê xwe dan çiyayan. Ez jî weke gelek kesan bandor bûm.”
Qehreman Til Temir di dawiya axaftina xwe bang li ciwanan kir û wiha got: “Bi taybet ez bang li ciwanên Bakur û Rojhilatê Sûriyeyê dikim. Îro bi saya Rêbertî û hezaran şehîdan şoreşeke pir muezem ava bûye. Ji bo ev şoreş bêhtir pêş bikeve û mayînde bibe, divê ciwan cihê xwe di nav refên QSD û YPJ’ê de bigirin. Em bi berxwedanê dikarin tola xwe ji komplogeran hilînin. Dîsa ji bo bi temamî pûçkirina komploya navneteweyî divê em her tim di nav têkoşînê de bin. Ev wezîfeyeke herî esasî ye. Di dawiyê de ez careke din komplogeran û hevkarên wan bi tundî şermezar dikim. Em ê ji sedî sed azadiya fizîkî ya Rêber Apo pêk bînin.”
