‘Hevdîtinên Aştî û Azadiya Civakî’ yên Partiya Herêman a Demokratîk (DBP) û Partiya Demokrasî û Wekheviyê ya Gelan (DEM Partî) dewam dikin.
Li Rêxistina Bajarê Sêrtê ya DEM Partiyê bi beşdariya Hevseroka Giştî ya DBP’ê Çîgdem Kiliçgun Ûçar bi beşdariyeke girseyî civîn hate lidarxistin. Hevserokê DEM Partiyê yê Sêrtê Eşref Tekîn nêrînên xwe yên li ser pirsgirêka Kurd anî ziman û ji bo mîtînga 8’ê Sibatê ya li Amedê banga tevlîbûnê kir.
Hevseroka Giştî ya DBP’ê Çîgdem Kiliçgun Ûçar jî di destPêka axaftina xwe de desteserkirina Şaredariya Sêrtê şermezar kir.
‘DIVÊ ABDULLAH OCALAN AZAD BIBE’
Çîgdem Kiliçgun Ûçar işaret bi tecrîda li ser Rêber Apo kir û anî ziman ku ji bo dema nû veguhere pêvajoyekê, yek ji gavên herî girîng jî azadiya Rêber Abdullah Ocalan e û got, “Ji bo çareseriya vê pirsgirêkê divê karibe bi partî, rêxistin û gelê xwe re nîqaş bike. Çima tenê bendewarî ji Birêz Ocalan tê kirin? Dewleta ku îdîa dike ew aqilekî destnîşan dike, çima gavekê neavêje? Li Meclîsê israrek heye. Di nîqaşên navbera salên 2013-2015’an de partiyên muxalîf tevlî pêvajoyê nehatibûn kirin. Niha bi tevlîbûna hemû partiyan re divê nexşerêyeke vê pêvajoyê diyar bibe. Lê belê li ti cihî nîqaşeke esasî nîne.”
Çîgdem Kiliçgun Ûçar anî ziman ku ev nîqaş nabe ku ji ti kesî yan jî desthilatdariyê re bê hiştin û got, “Bi destpêkirina sedsala nû re ji bo em berpirsyariyê bi cih bînin, em li hev kom bûn.”
Civîn piştre li çapemeniyê girtî dewam kir.
