Yekitiya Jinên Ciwan û Tevgera Ciwanên Şoreşger bi banga azadkirina fîzîkî ya Rêber Apo meşek li bajarê Dirêbsiyê li dar xist.
Meş ji pêşiya Navenda Tevgera Ciwanan ber bi Çerxerêya Gardînyayê ve dest pê kir. Di meşê de wêneyên Rêber Apo û alên Yekitiya Jinên Ciwan hatin hildan. Pankartên bi nivîsên “Em ê bi rihê berxwedana Rojava em ê azadiya fîzîkî ya Rêber Apo mîsoger bikin” jî hatin vekirin.
Li Çerxerêya Gardînyayê deqeyek rêz hat girtin. Piştre ji rêveberên Yekitiya Jinên Ciwan Arsoz Xelef axivî û pergala tecrîdê ya li Îmraliyê şermezar kir.
Arsoz Xelef anî ziman ku heya ku azadiya fîzîkî ya Rêber Apo pêk neyê axaftina li ser azadiyê mumkin nine. Her wiha bang li civaka navneteweyî û saziyên mafên mirovan kir ku ji bo azadiya fîzîkî ya Rêber Apo bikevin tevgerê.
Arsoz Xelef di dawiya axaftina xwe de bang li tevahî ciwanan kir ku têkoşîna ji bo azadiya fîzîkî ya Rêber Apo bidomînin û piştgiriyê bidin pêvajoya Aştî û Civaka Demokratîk.
Meş bi dirûşmên “Bê Serok jiyan nabe” û “Bijî berxwedana zindanan” bi dawî bû.
