Eşkere bû ku li gundê Şen ê navçeya Xîzan a Bedlîsê zarok hem ji mafê perwerdeya veguhestinê bêpar hatine hiştin hem jî ji ber ku rê ji ber berfê nehatine vekirin nekarîne biçin dibistanê.
Ji şêniyên gundê Şenê Çetîn Gol ji ANF’ê re axivî û got, ji ber ku wesayita servîsê ya ber bi dibistana navîn a bi 8 kîlometreyî dûr nehatiye peydakirin, 40 zarok 2 meh in ji mafê perwerdeya veguhestinê bêpar hatine hiştin. Her wiha hefteyeke jî ji ber ku rê ji ber berfê nehatine vekirin zarok nikarin biçin dibistanê.
Çetîn Gol anî ziman ku mafê perwerdeyê yê zarokên diçin dibistana navîn bi rêk û pêk tê astengkirin û got, “Ji bo zarokên me bi servîsê biçin dibistanê bi mehan e em li ber xwe didin. Ji Midûriyeta Perwerdeya Mîllî ya navçeya Xîzanê heta bi qeymeqamiyê cihekî fermî nema ku me serî lê nedan. Qeymeqamiyê diyar kir ku ji ber rêyên gund xerabe ye xizmeta servîsê ji gund re nayê dayin û xwest, em bi derfetên xwe zarokên xwe bigihînin dibistana bi 8 kîlometreyî dûr. Halbûkî li gundiyê Xorozê yê ku gelekî nêzî me ye ji bo 3 xwendekaran servîsê dişînin. Lê belê ji bo gundê Şen ê ku 40 xwendekarên xwe hene wesayiteke servîsê nadin. Ji ber vê jî zarokên me 2 meh in ji perwerdeyê bêpar hatine hiştin. Herî dawî me ev pirsgirêk ji Rêxistina Bajêr a Bedlîsê ya DEM Partiyê re û parlamenterên DEM Partiyê re ragihand. Me xwest, mijarê bixin rojeva walî. Ji ber ku encam ji vê jî derneket rêveberên bajêr ên DEM Partiyê lêçûna servîsa zarokan ji bêrîka xwe dan û bi vî rengî kirin ku perwerdeya xwe dewam bikin.”
Gol destnîşan kir ku wan pirsgirêka perwerdeyê ya veguhestinê bi saya rêveberên DEM Partiyê çareser kir, lê belê vê carê ji ber berfa zêde rêyên hatin girtin nehatin vekirin, zarok nekarîn biçin dibistanê. Gol diyar kir ku ji bo vekirina rêya gund wan serî li meqamên fermî dan, lê hefteyek e rê nehatiye vekirin.
Gol diyar kir ku ev zilm bi zanebûn li gundê wan tê kirin û got, “Ji ber ku ji gundê Şenê dengek ji AKP’ê re nehate dayin, xizmetê nadin vê derê, bi vî rengî ceza dikin.”
