Tevî wextê derbas bûye jî daxwazên gel ên têkildarî temînata qanûna bingehîn û avêtina pêngavên şênber nehatine bicihanîn. Tevî hemû bangan jî neavêtina pêngavan di nava gel de dibe sedema derketina nebaweriyê û gel jî tevî hemû hiştan hê jî li banga aşitiyê xwedî derdikeve. Endamê Meclîsa Partiyê (MP) ya Partiya Demokrasî û Wekheviyê ya Gelan (DEM Partî) û Parêzer Salîh Tekîn diyar kir ku divê daxwazên gel werin bicihanîn û pêvajo bigihîje zemîneke yasayî û got: ‘’Ji bo welatekî demokratîktir em ê têkoşînê bidomînin.’’
Piştî banga 27’ê Sibatê û biryara PKK’ê ya xwefesixkirinê her kesî berê xwe da Enqereyê, Endamê MP’ê yê Partiya Wekhevî û Demokrasiyê ya Gelan (DEM Partî) û Parêzer Salîh Tekîn got ku desthilatdariyê hê jîpêngaveke demokratîkbûyînê neavêtiye. Salîh Tekîn piştre anî ziman ku pêvajo bes bi îradeyeke yekalî dimeşe û got ku divê Meclîs bikeve dewrê, temînatên hiqûqî werin dabînkirin û yasayên entegrasyona demokratîk bikevin meriyetê.
‘AVÊTINA PÊNGAVAN TÊ GÎROKIRIN’
Salîh Tekîn di dewama axaftina xwe de bal kişand ser geşedanên weke ‘’Banga Aşitî û Civaka Demokratîk’’ ya Rêber Apo, 12’emîn Kongreya PKK’ê, standina biryara xwefesixkirinê û şewitandina çekan û ev yek anîn ziman: ‘’Heya niha pêngavên girîng yên yekalî yên hatine avêtin hene. Lê belê ji aliyê komîsyona hatî avakirin û desthilatdariyê ve heya niha tu pêngavên şênber nehatine avêtin. Diviya heya niha têkildarî entegrasyona demokratîk pêşçarçoveyek bihata avakirin û pêngavên ku temînata hiqûqî bidin bihatana avêtin.’’
Salîh Tekîn piştre îfade kir ku li Tirkiyeyê ev demeke dirêj e polîtîkayên ewlehiyê tên sepandin û ev yek anîn ziman: ‘’Bi taybetî jî ji bo jidûrketina van polîtîkayan dihat hêvîkirin ku hin pêngavên şênber werin avêtin. Lê belê mixabin ku heya niha têkildarî vê yekê tiştek nehatiye kirin. Ev demeke dirêj e li Tirkiyeyê têkildarî polîtîkayên ewlehiyê û siyasîbûna darazê fikar hene. Diviya sererastkirinên ku van fikaran ji holê rakin, werin kirin lê belê di vê mijarê de geşedaneke erênî çênebû.’’
‘PÊVAJO DIVÊ BIGIHÎJE ZEMÎNEKE QANÛNÎ’
Tekîn destnîşan kir ku Meclîs divê di pêvajoyê de bi roleke hîn bandortir rabe û bang kir ku gel li gorî ruhê pêvajoyê têkildarî daxwazên xwe baldar be. Tekîn diyar kir ku divê Meclîs îradeyeke ku li gorî pêdiviyên pêvajoya civaka demokratîk raber bike, girtiyên nexweş bên berdan û hemwelatiya wekhev pêk were û got, yek ji daxwazên esas ên gel ew e ku pêvajo bigihije zemînekî qanûnî.
‘DAXWAZ NEGIHIŞTIN TI ENCAMÊ’
Tekîn anî ziman ku desthilatdariyê di rabirdûyê de bi gotinên azadîxwaz tevgeriya ye û bi bîr xist ku zagona bingehîn a heyî salên dirêj weke “zagona bingehîn a darbeyê” hatiye rexnekirin. Tekîn diyar kir ku tevî vê jî di zagona bingehîn de ti guhertin pêk nehatine û got, “Ji bo maf û azadiyê pêdiviya zagoneke bingehîn a nû, di demên cuda de hate behskirin. Lê mixabin ev nîqaş gelek caran li ser esasê pêdiviyên siyasî yên demê hatin bikaranîn û guhertinên ji bo zagona bingehîn negihiştin ti encamê.”
Tekîn ragihand ku ji bo zagoneke bingehîn a demokratîk a ji hemû beşên civaka Tirkiyeyê re bibe bersiv, gavên şênber nehatine avêtin û got, “Di serî de Meclîs divê hemû sazî bi qanûnên entegrasyona demokratîk piştgiriyê bidin pêvajoyê û divê gavên şênber bên avêtin.”
‘EM Ê TÊKOŞÎNA XWE BIDOMÎNIN’
Tekîn bilêv kir ku Birêz Abdullah Ocalan di nava şert û mercên heyî de ji bo pêşveçûna pêvajoyê înîsiyatîf wergirtiye û ev tişt got, “Ji bo Tirkiye bigihije zagoneke bingehîn a demokratîk û azadîxwaz û pêdiviyên hiqûqî pêk bên, em ê xebatên xwe û têkoşîna xwe bidomînin.”
