Li gorî nûçeya rojnameya Financial Times a Îngiliz, wezîrên karên derve yên Yekîtiya Ewropayê wê di civîna hefteya bê de ya li Qibrisê bê lidarxistin, mijara jinûve destpêkirina danûstandina dîplomatîk a bi Rusyayê re binirxînin. Di nûçeyê de hate ragihandin ku ji bo meşandina hevdîtinên gengaz ên bi navê Yekîtiya Ewropayê navê hin kesayetan di rojevê de ye.
Li gorî agahiyên ji kûlîsan, li gel Serokê berê yê Banka Navendî ya Ewropayê Mario Draghi û Serokwezîra berê ya Elmanyayê Angela Merkel navê Serokkomarê Finlandiyayê Alexander Stubb û Serokkomarê berê yê Finlandiyayê Sauli Niinistö jî weke navbeynkaran tê bilêvkirin.
Di nûçeyê de her wiha hate ragihandin ku rêveberiya Serokê DYE’yê Donald Trump ji ber şerê li Rojhilata Navîn pêvajoyeke xurt a dîplomatîk dimeşîne û peyam daye hevalbendên xwe yên Ewropî ku li gel danûstandinên Washington bi Moskowê re dimeşîne, ew ne li dij in ku Ewropa jî bi Putin re hevdîtinan bike.
Têkiliyên dîplomatîk ên fermî yên navbera Yekîtiya Ewropa û Moskowê piştî dagirkeriya Rusyayê ya li Ukraynayê bi giranî sekinî bû. Ji hingî ve hin lîderên Ewropî hin hewldanên şexsî kiribin jî Bruksel û Kremlinê di asta saziyî de danûstandineke bi rêk û pêk nekirin.
