Komeleya Rojnamevanan a Dîcle Firatê (DFG) bi nirxandinekê rapora binpêkirina mafên rojnamevanan û saziyên ragihandinê ya meha Îlonê eşkere kir. Di meha Îlonê de jî gelek mafên rojnamevanan û saziyên ragihandinê hatine binpêkirin.
Rapora DFG’ê ya meha Îlonê bi vî rengî ye:
“Me mehek din jî ya ku neheqî û sansura li ser saziyên medyayê û rojnamevanan hatin kirin li pey xwe hişt. Di meha Îlonê de hate dîtin ku astengkirin û xwegihandina naveroka nûçeyan li ser biryara Dadgehên Cezayê Sulhê ku xwe dispêre serlêdanên Saziya Agahiyên Teknolojiyê zêde bûne. Roja ku qeyûm tayînî Serokatiya CHP’ê ya Stenbolê hate kirin û polîsan avahiya wê dorpêç kir, sistkirina platformên medya dîjîtal pêk hat. Piştî 21 saetan xwegihandinên platformên medya dîjîtal asayî bûn. Bi hinceta ‘pirsgirêka Ewlehiya Neteweyî’ xwegihandinên parvekirinên têkildarî avahiya CHP’ê hatin astengkirin û derheqê 36 hesaban de lêpirsîn hate destpêkirin. Her wiha 10 kesên ku parvekirinan kiribûn hatin binçavkirin. Roja 8’ê Îlonê ku li dijî navenda polîsan a Îzmîrê êriş pêk hat, biryara qedexeya weşanê hate dayîn.
Di 11’ê Îlonê de xwegihandina Grokê ya X’ê hate astengkirin. Astengkirin bi hinceta ‘parastina Ewlehiya Neteweyî û pergala gelemperiyê-cemaweriyê’ hate kirin. Di 9’ê Îlonê de jî nûçeyên derheqê Qanûna Avhewayê û Cengîz Holdîngê de bi hinceta ‘ewlehiya neteweyî’ hatin astengkirin.
Di 7’ê Îlonê de hesabên belgefîlma ‘Bîra Sûrê’ ya ku ji aliyê rojnameger Azad Altay ve li ser qedexeya derketina derve ya Sûrê hatiye çêkirin jî hatin astengkirin. Her wiha qenala YouTubeyê ya rojnamevan Can Dundar hate astengkirin. Hesabê X’ê yê Medya Haberê û nûçeyên têkildarî kurê Fahrettîn Altûn hatin astengkirin. Di meha Îlonê de hesabên X’ê yên rojnameya Yenî Yaşamê û ETHA’yê bi heman hincetê du caran ji xwegihandinê re hatin astengkirin. Xwegihandina malpera webê ya Ajansa Nûçeyan a Firatê hate astengkirin.
Herî dawî jî parvekirinên X’ê yên têkildarî mirina bi guman a Rojîn Kabaîşê ku dixwestin lêpirînek bi bandor bê destpêkirin, ji aliyê 8’emîn Dadgeha Hiqûqê ya Asliyeyê ya Wanê ve hatin astengkirin. Hate zanîn ku zêdetirî 200 hesab û parvekirin ji bo ku ji xwegihandinê re bên astengkirin, li ser daxwaza Zanîngeha Yuzuncuyilê ya Wanê pêk hatiye.
Di meha Îlonê de xwegihandina 49 hesabên medya dîjîtal û 30 nûçeyan hate astengkirin, 6 malperên înternetê jî ji aliyê Saziya Agahiyên Tekonoljiyê ve hatin girtin.
Di meha Îlonê de lêpirsîn û neheqiyên li dijî rojnamevanan jî kêm nebûn û di nava mehê de 10 rojnamevan hatin binçavkirin, rojnamevanek hate girtin. Derheqê 19 rojnamevanan de lêpirsîn hate destpêkirin û lêpirsînên derheqê 22 rojnamevanan de ku didomiyan jî veguherîn dozan û derheqê rojnamevanan de doz hatin vekirin.”
