Meclisa Şaredariya Bajarê Mezin a Wanê, civîna xwe ya meha Sibatê li dar xist. Gelek welatî, nûnerên rêxistinên civaka sivîl û partiyên siyasî tevlî bûn. Civîn, li Eywana Konferansê ya Tahir Elçî ya Baroya Wanê hat lidarxistin. Di civînê de sînevîzyoneke pêvajoya ji hilbijartinên rêveberiyên herêmî yên 31’ê Adara 2024’an heta niha vedibêje hate pêşandan.
Piştre jî Hevşaredarê Bajarê Mezin ê Wanê Abdullah Zeydan ku li şûna wî qeyûm hatiye tayînkirin, axivî. Zeydan, bi bîr xist ku di salvegera Komploya Navneteweyî ya 15’ê Sibatê ya li dijî Rêber Apo de li şaredariyê qeyûm hatiye tayînkirin û got: “Ev ne rewşekî rashatî bû. Êrîşên li dijî Rojava û tayînkirina qeyûman, parçeyeke heman xeta siyasî ye. Gelê Kurd jî bi yekitî û berxwedana neteweyî bersiv da. Kirdeya berxwedanê, gel e. Polîtîkayên qetlîam, binçavkirin û sirgûnê nekarî bi gelê Kurd serî bide tewandin. Ev gel, xwedî îrade ye.”
Di berdewamê de Zeydan anî ziman ku rêveberiya qeyûm xwedî zîhniyeteke dijî jin, ekolojî û aştiyê ye û got dê ev zîhniyet bi biryardariya gel bi dawî bibe.
TEXRÎBATA SERDEMA QEYÛM BI RAPORAN VEGOT
Piştî axaftina Zeydan, xebatên rêveberiya şaredariyê ya di dema ser peywira xwe hatin pêşandan û rapora texrîbata qeyûm rê li ber vekirî hate xwendin. Di raporê de îşaret bi xizmetên hatine sekinandin, projeyên hatine sekinandin û guherînên sazûmanî hate kirin. Piştî pêşkeşkirina raporê, beşdaran mafê axaftinê kir û nirxandinên xwe kir.
‘QEYÛM NE TENÊ KIRARIYEKE ÎDARÎ YE’
Hevşaredara Bajarê Mezin a Wanê Neslîhan Şedalê jî anî ziman ku wan hewl da paradîgmaya pirzimanî, pirçandî û pirnasnameyî di rêveberiyên herêmî de bixin meriyetê û wiha dirêjî da axaftina xwe: “Rêveberiya qeyûm, xebatên jinê esas digirin û yên kolektîf hedef digire. Yek ji sedema sereke ya tayînkirina qeyûm jî ev ferasete ye. Sepana qeyûm ne tenê teserûfeke îdarî ye, her wiha mekanîzmayeke jiholêrakirina îradeya gel e.”
‘EM WÊRANIYA QEYÛM LI HER DERÊ DIBÎNIN’
Hevberdevka Înîsiyatîfa Yekitiya Demokratîk Gulcan Kaçmaz Sayyîgît jî diyar kir ku ew wêraniya qeyûm rê li ber vekirî li her derê dibînin û got: “Hemû xebatên di qadên jin, zarok û çandî de hatine kirin, ji hêla qeyûm ve hatin tunekirin. Rejîma qeyûm naxwaze di van mijarn de xebat bên kirin. Heke gel destûr dabûya wan, dê her 14 şaredarî nehatine bidestxistin.”
Nûnerên rêxistinên civaka sivîl jî aliyên neyînî yên polîtîkayên qeyûm anîn ziman û xwestin sepana qeyûm demildest bê bidawîkirin.
Civîn, piştî axaftinan bi dawî bû.
