Di doza Ozden Karabalik (32) de ku li navçeya Korkût a mûşê 28’ê Hezîrana 2022’an bi gumanbarî jiyana xwe ji dest da, bersûcên dihatin darizandin hemûyan beraet kirin. Ozden Karabalik li mala ku lê dima destpêkê ji aliyê zarokên xwe ve mirî hate dîtin. Lêpirsîna bûyerê piştî 2 salan veguherî dozê. Hevserê Ozden Karabalik Kerem Kalabalik jî di nav de daxwaza cezakirina 12 kesan hate kirin, lê belê bersûc hemû hatin berdan. Di hinceta biryara beraetê ya dadgehê de hate gotin, “Delîlekî şênber û cihê baweriyê nehate dîtin.”
Ozden Karabalik bi çekê jiyana xwe ji dest da û çeka navborî jî roja destpêkê li cihê bûyerê nehat dîtn. Têkildarî Ozden Karabalik rapora otopsiyê hate amadekirin. Tîmên lêkolînê yên piştî bûyerê gihîştin cihê bûyerê û dozgeriyê, Kerem Karabalik ê ku Ozden Karabalik pê re zewicî bû û du kesên pê re binçav kirin, lê belê piştî îfadeyê hatin berdan. Çeka ku di bûyerê de hate bibkaranîn piştî bi rojan li hewşa mala Ekrem Karabalik li binê axê veşartî hate dîtin.
Di çaroveya lêpirsîna bûyerê de hate ragihandin ku Kerem Karabalik tundî li Ozden Karabalik dikir û her kesên ku îfade dan, bûyer weke ‘xwekuştinê’ pênase kirin. Lêpirsîn jî piştî 2 salan veguherî îdîanameyê û di çarçoveya darizandinê de Kerem Karabalik hate girtin.
Di dozê de li gel 12 gumanbaran her wiha bi dehan şahid jî hebûn, lê belê îfadeya hemû aliyan bi navê ‘agahî wergirtinê’ hate girtin. Bi gilînameyê re îfadeya bersûcan jinûve hate girtin û bersûcan bûyer weke ‘xwekuştinê’ pênasekirin. Dozgeriyê bi delîlan û îfadeyên nakok diyar kir ku bûyer dibe ku ‘cînayet’ be. Her wiha kiryar Kerem Kalabalik di îfadeya xwe de anî ziman ku çeka bû sedema mirina Ozden Karabalik ‘çeka cerdevan’ e.
Di gilînameyê de hate ragihandin ku gumanbar hemû bi heman rengî axivîn, hate fêhmkirin ku ji destpêkê ve weke hev tevdigerin, piştî bûyerê hewl dan ku delîlan tarî bikin û guman zêde bûn ku bi zanebûn sûcê kuştina jinê kiribin. Di darizandinê de ku salekê dewam kir, du bersûcên girtî hatin berdan. Di rûniştina dawî de jî hemû bersûc hatin berdan û biryara beraetê têklidarî wan hate dayin.
