Li gorî Wezareta Tenduristiyê ya Hûsiyan, êrîş li paytexta Sana, li wîlayeta Saada ya li bakur, wîlayeta El Bayda ya navendî û bajarokê Radaa yê navendî hate kirin.
Berdevkê wezaretê Anis El Aşahi li ser medya dîjîtal a X’ê daxuyanî da û got, “Piraniya wan jin û zarok’ herî kêm 31 kes mirin, 101 kes jî birîndar bûn.
Donald Trump ragihand ku Dewletên Yekbûyî yên Emerîkayê (DYE) li hemberî Hûsiyên li Yemenê dest bi ‘çalakiyeke leşkerî ya xurt û bi biryar’ kirine.
Trump hişyarî da û got, “Heta ku em bigihêjin armanca xwe em ê hêza kujer bi kar bînin.”
Ev êrîş piştî ku Donald Trump di 20’ê Çileyê de dest bi wezîfeyê kir bû êrîşên destpêkê yên DYE’yê yên li hemberî Hûsiyan.
Hûsiyan hişyarî dan ku ev êrîşkarî wê bêbersiv nemîne.
Di daxuyaniya ofîsa siyasî ya Hûsiyan de ku li qenala televîzyonê Al Massirahê hate weşandin, hate gotin, “Hêzên me yên çekdar amade ne ku bersivê bide vê yekê.”
TRUMP GEF LI ÎRANÊ XWAR
Serokê DYE’yê peyamek ji Îranê re jî şand û got, “Gefê li gelê Emerîkayê, Serokê wan an jî rêyên veguhestinê yên cîhanê nexin. Eger hûn gefê bixwin baldar bin, ji ber ku Emerîka wê hesab ji we bipirse û em ê qet başiyê bi we re nekin.”
Şefê dîplomasiyê yê Îranê Abbas Arakçî jî li ser hesabê medya dîjîtal X’ê daxuyaniyek da û got, “Erk û mafê hikumeta Emerîkayê nîne ku polîtîkaya derve ya Îranê diyar bike.” Her wiha bang kir ku dawî li kuştina gelê Yemenê bîne.
