Ji aktîvîstên siyasî yên Başûrê Kurdistanê Kîvî Dostkî, da xuyakirin ku desteka beriya û piştî banga Rêber Apo tê dayîn, dikare binesaziya yekîtiya Kurdan ava bike û got, “Weke gel divê em zorê bidin serokên partiyan ji bo vê yekîtiyê.”
Kîvî Dostkî, ji ANF’ê re axivî û diyar kir ku banga Rêber Apo ya ‘Aştî û Civaka Demokratîk’ hêviyeke mezin di nava Kurdan de ava kiriye. Dostkî, da xuyakirin ku serketina vê pêvajoya dîrokî ji bo Kurdan daxwazeke hevpar e û anî ziman ku aliyê herî hêja yê pêvajoyê, beriya bangê hevdîtinên bi hemû partiyên Kurd û avahiyên siyasî yên li parçeyên din e.
Dostkî got, “Heyeta Îmralî ya DEM Partiyê, li Başûr bi hemû partiyên Kurdistanî re hevdîtin kir. Rojava jî tevlî vê pêvajoyê hat kirin. Ev yek ji bo yekparêziya gelê Kurd pêşketineke gelekî girîng e. Ji ber vê berpirsyarî dikeve ser milê me hemûyan.”
EV PIŞTGIRÎ DIKARE BINESAZIYA YEKÎTIYA KURDAN AVA BIKE
Dostkî, diyar kir ku erkek mezin a dîrokî dikeve ser milê Serokê Giştî yê YNK’ê Bafîl Celal Talabanî û Serokê Giştî yê PDK’ê Mesûd Barzanî û hemû aktorên siyasî û got, “Piştgiriya ji bo pêvajoya ku Birêz Ocalan daye destpêkirin, hem erkek dîrokî û hem jî erkek neteweyî ye. Ev piştgirî dikare binesaziya yekîtiya Kurdan ava bike. Weke gel divê em zorê li rêveberên partiyê bikin ku vê yekîtiyê pêk bînin. Başûrê Kurdistan bi taybetî di qada navneteweyî de hema hema weke dewleteke serbixwe tê dîtin. Ji bo vê jî berpirsyariya avahiyên siyasî yên li Başûr hê mezintir e. Divê hemû partiyên Başûr hem ji aliyê madî hem jî manewî ve destekê bidin vê pêvajoyê. Ev ne mineteke, erka wan a neteweyî ye.”
