Meşa Bi Şev a Femînîstan a her sal di çorçove 8’ê Adarê de tê lidarxistin, îsal jî li gelek bajaran bi beşdarbûna bi hezaran jinan hate lidarxistin.
ÎZMÎR
Jinên li Îzmîrê, ji bo 8’emîn Meşa Bi Şev a Femînîstan li Cadeya Şehîdên Qibrisê a li navçeya Alsancakê li hev civiyan û heya pêşiya Navenda Çandê ya Turkan Saylanê meşiyan.
Jinên Kurd bi cil bergên xwe yên gelêrî beşdarî çalakiyê bûn û tim û tim dirûşmeyên ‘’Tayîp bireve jin tên’’, ‘’Em hebûn em hene û em ê hebin’’, Jin jiyan azadî’’ û ‘’Bijî têkoşîna jinan’’ hatin berzkirin. Parlamentera DEM Partiyê Bûrcû Gul Çûbûk, Parlamentera CHP’ê Gokçe Gokçen, Seroka Şaredariya Karabaglarê Helîl Înay Kinay û bi hezaran jin beşdarî çalakiyê bûn.
Metna bi Kurdî ji aliyê Ayşenûr Eker ve û ya bi Tirkî jî ji aliyê Asli Can ve hate xwendin.
DENÎZLÎ
Bi hezaran jinên ku bi banga Platforma 82ê Adarê ya Denîzliyê li Parka Ataturk li hev civiyan, ji vir heya Qada Çinarê meşiyan û li vir jî daxuyaniyek hate dayîn. Di çalakiyê de pankarta bi nivîsa ‘’Bijî 8’ê Adarê’’ hate vekirin û dowîza bi nivîsa ‘’Serhilhan çandek e û ez jineke serhildêr im’’ hate hilgirtin û dirûşmeyên ‘’Qetilkirina jinan polîtîk e’’ û ‘’Em ne malbat in em jin in’’ hatin berzkirin.
Berdevka Platforma Jinan a KESK’ê ya Denîzlîyê Ozge Sarma li ser navê Platformê axivî diyar kir ku ligel polîtîkayên zayendperest ên desthilatdariya AKP-MHP’ê, krîzên aborî, kiryarên antîdemokratîk, yekperestî û zextên li ser birêxistinbûn û xweîfadekirina bi awayekî azad û binpêkirina hiqûqê bandoreke mezinli jiyana jinan dike û got: ‘’Li hemberî şerên li Rojhilata Navîn em ê maf û destkeftiyên jinan biparêzin. Bijî piştevaniya jinan.’’
AYDIN
Li Aydinê jî jinan li gel Platforma Jinan a Aydinê li qadê bajêr daxuyaniyeke çapmeniyê dan. Di çalakiyê pankarta bi nivîsa ‘’Bijî 8’ê Adarê’’ hate hilgirtin û tejsta daxuyaniyê ji aliyê Sekretera Egîtîm-Sen’a Aydinê Alev Karakaya ve hate xwendin. Li qadê gelek caran dirûşmeyên Jin jiyan azadî”, “Bijî tekoşîna jinan”û ‘’Jin bi hev re bi hêz in’’ hatin berzkirin. Jinên DEM Partî û TJA’yî bi cil û bergên xwe yên gelêrî beşdarî çalakiyê bûn.
EDENE
Ekîba Meşa Bi Şev a Femînîstan a Edeneyê bi şîara ‘’Serhildana Femînîst a 8’ê Adarê’’ hate lidarxistin. Jin li ser Cadeya Gazîpaşa kom bûn û li vir gelek caran dirûşmeya ‘’Jin Jiyan Azadî’’ hate berzkirin û jinan govend gerand. Jin li Cadeya Ataturk heya Sîteya Gulbahçe bi berzkirina dirûşmeyan meşiyan.
Piştî meşê daxuyaniyek hate dayîn û teksta daxuyaniyê ji aliyê Pelîn Çîçek ve hate xwendin.
ANTALYA
Li Antalyayê jî Meşa Bi Şev a Femînîstan hate lidarxistin. Meşê li Deriyê Hadrian dest pê kir û heya Parka Karaalioglû berdewam kir. Jinan li parkê govend gerand û çalakî li vir bi dawî bû.
