Dewleta Tirk a dagirker û çeteyên wê ji Kanûna 2024’an heta niha êrîşî Bendava Tişrîn û Pira Qereqozaxê dikin. Şervanên YPJ, YPG û QSD’ê bi ruheke fedaî û profesyoneltiyeke leşkerî li ber xwe didin û êrîşên dagirkeriyê vala derdixin. Yek ji fermandara Yekîneyên Parastina Jin (YPJ) Şîlan Şoreş têkildarî êrîş û berxwedana li qadê ji ANF’ê re axivî.
Şîlan Şoreş anî ziman ku demeke dirêj e li Qeraqozaxê şer tê meşandin û got: “Şer bi her awayî tê meşandin lê belê bi taybet li ser Pira Qereqozax têmeşandin û em di eniya şer de cihê xwe digirin. A niha jî dijmin bi her awayî bombebaranan pêk tîne. Bi her awayî dixwaze Pira Qereqozax ji destê me bistîne. Lê belê em bi xwe weke şervanên YPJ’ê û bi sekna xwe ya şoreşgerî ya li hemberî vî dijminî, çi dibe bila bibe em nahêlin bikeve axa me û bikare axa me dagir bike. Heta niha jî em bi hêza şervan û gelê me li ser piyan e. Taybet dagirkeriya Tirk tevî ew qasî topbaran û çeteyên xwe jî êrîş dike. Lê belê çi dibe bila bibe jî em nahêlin ku bikeve axa me.”
Şîlan Şoreş got ku bi saya gel hêz û morala wan bilind e û wiha dom kir: “Bi saya gelê me em li ser piyan in. Bi saya vê moralê em dikarin weke sekneke felseya Rêbertî li hemberî dijmin bisekinin ku hêz û teknîka dijmin bişkînin. Taybet di vê dawiyê de me ruhê gelê şoreşger dît. Li hemberî gelê xwe em nikarin tiştekî bibêjin. Ji ber ku tişta ku asta moralê me bilind girtiye û me jê hêz girtiye, gelê me ye.”
Şîlan Şoreş diyar kir ku şer berdewam dike û bi van gotinan dawî li axaftina xwe anî: “Heta êrîş hebe em ê şer bikin û li ber xwe bidin. Heta ku derê be jî em ê şer bikin. Hêza me jî pişta me jî gelê me ye. Em bi saya gelê xwe li ser piyan in. Ger heta dawiyê wisa berdewam bike, em dikarin li her derê ser bikevin û gelek welatan jî rizgar bikin.”
