Nerazîbûnên li dijî êrîşa Iraqê ya ser şervanên YBŞ’ê û dîl girtina şervanên birîndar mezin dibe. Berdevka TAJÊ Rîham Hico û Siyasetmedar Qasim Keşko yên di kona çalakiyê ya li ber îstîxbarata Iraqê de cih digirin, têkildarî êrîş û armanca Iraqê ya ji vê êrîşê ji ajansa me re axivîn.
Berdevka TAJÊ Rîham Hico, diyar kir, hinek beşên di nava artêşa Iraqê de bi zanabûn li Şengalê tevlîheviyan çêdikin û got: ‘‘Hinek beşên di nava artêşê de ne li Şengalê ji sala 2022’yan heya niha bi zanabûn tevlîheviya çêdikin û dixwazin komployan bikin. Bûyera vê dawiyê derketî jî girêdayî vê ye. Dema şervanên YBŞ’ê li ser erka xwe bûn, artêş xwest wan bigire. Li ser vê artêş wan neçar kir ku xwebiparêzin. Ya ew kirine, dikeve çarçoveya parastina rewa. Şervanên me hem birîndar kirin, hem jî êşkênce kirin û girtin. Niha dayikên wan şervanan li bin vê konê de ne.’’
‘EM LI BA HÊZÊN XWE NE’
Rîham Hico weke TAJÊ piştgiriya xwe ya ji bo hêzên parastinê YBŞ-YJŞ’ê anî ziman û wiha bersiva rayedarên Iraqê da: ‘‘Em ji hikûmeta Iraqê re dibêjin, em li ba hêzên xwe û şervanên xwe ne. Em bê YBŞ’ê li Şengalê jiyan nakin. Îro YBŞ’ê ji bo me ji av û nan jî girîngtir e. Ew hêza me ya parastinê ye. Em bi wan hene. YBŞ’ê û gel, yek e. Hemû dayikên wan şervanan li vir kom bûne. Em dibêjin, yan wê Iraq zarokên van dayikan bide, yan eger were xwestin em ê li Şengalê, jiyanê rawestînin. Hêzek ku me ji fermanê parastine. Ji wan re dibêjin, ‘Çete’. Ewên ku Iraq behs dike, parêzvanên me ne. Em bi tu awayî qebûl nakin axaftinek wisa ji bo şervanên me were kirin. Ew rûmeta Şengalê ne. Em ê heya encam girtinê li ber deriye îstîxbaratê û Polîsên Federal di çalakiyê de bin.’
‘ŞENGALÊ MILÎTARÎZE KIRINE’
Rîham Hico, diyar kir ku artêşa Iraqê hewl dide Şengalê milîtarîze bike û nerazîbûn nîşan da. Rîham Hico got: ‘‘Niha nava Şengalê leşker bi cih kirine. Dema ferman rabû, wê demê ev hêz û çek anîban, wê ferman çêneba. Lê ewqas hêz ji bo dijbertiya Êzidiyan anîne, eger ne wisaye nexwe ji bo çî ye? Kî li vir heye, ewqas leşker anîne? Lê her kes dizane, Şengal herêma herî bi ewle ya Iraqê ye. Hemû sînorên Iraqê ji çeteyan û dijmin re vekirine. Tirkiye derdora 60 km ketiye nava axa Iraqê û rojane bombebaranan dike. MİT xwe lê bi cih kiriye, Iraq ewqas hêza xwe ne biriye wir û şer nekiriye, lê niha tê ji me re behsa qanûnan dike. Ma qanûnên Iraqê tenê ji bo Êzidiyan derbasdar e? Em qanûneke hebûn û nasnameya me nas nake, nas nakin. Ji bo me pîvan û exlaqa civakî derbasdare, ne qanûnên wan. Kî destê xwe dirêjî Şengalê û zarokên wê bike, ew dest dê were jêkirin. Me çawa peymana 9’ê Cotmehê vala derxistibe, em ê niha jî komployên hikûmeta Iraqê vala derbixin.’’
‘BI VÊ ÊRIŞÊ RE ÊZIDÎ HATINE HEDEF GIRTIN’
Siyasetmedar Qasim Keşko jî komploya li dijî şervanan weke ajandayeke derve dibîne û dibêje: ‘‘Xortên me yên ji aliyê Iraqê ve hatine girtin, ewlekariya herêmê pêk dianîn. Bi awayeke pir nexweş kemîn avêtin pêşiya wan ku îhtîmaleke ev jî ajandayeke hêzên derve be. Bi vê êrîşê re Êzidî hatin hedef girtin. Girtina van xortên me ne di xizmeta Iraqê de ye. Ev komployeke. Berê niha serok eşîrên Şengalê ji bo hêzên me bang li Iraqê kiribûn. Eger hêzên me yên parastinê ne ji Êzidiyan be, wê dîsa rûberûyê metirsiyan werin. Hîn jî metirsiya DAÎŞ’ê heye û xwe ji nûve rêxistin dike.’’
‘DIVÊ GELÊ ME BERXWEDANÊ MEZIN BIKE’
Qasim Keşko bang li xelkê Şengalê kir ku nerazîbûnên xwe raber bikin û wiha axaftina xwe bi dawî kir: ‘‘Hêvî ji hemû xelkê me dikim, hemû rabin ser xwe. Li ser hesabên medya dîjîtal heqaret li me Êzidiyan dikin û gef li van şervanên me dixwin. Em vê yekê qebûl nakin. Yên Iraqê parastine, niha mûameleya ‘terorîst’ li wan tê kirin. Divê gelê me heya negihijin şervanên xwe û encam negirin, dest ji berxwedana xwe bernedin û hemû xelkê me jî tevlî vê berxwedanê bibe. Em parçebûnê naxwazin, lê divê Iraq jî rêz li gelê me û îradeya wê bigire.’’
