Jinên ku bi boneya 8’ê Adarê Roja Jinên Kedkar ên Cîhanê li gelek bajarên Fransayê daketin qadan, careke din hêza piştevaniyê nîşan dan.
MARSILYA
Li Marsilyayê 8’ê Adarê Roja Jinên Kedkar ên Cîhanê bi pêşengiya Meclîsa Jinên Kurd a Arîn Mîrkan bi meşekî bi reng û bi coş hate pîrozkirin.
Meş ji Qada Canabiere destpê kir û bi muzîk, govend û dirûşmeyan heta Vieux Portê dewam kir. Ji xeynî jinên Kurd, komeleyên jin ên Fransî û parêzvanên mafên jinan beşdarî meşê bûn û mînakekî piştevaniyê ya navneteweyî nîşan dan. Di tevahiya meşê de dirûşmeyên “Jin, Jiyan, Azadî” û “La Femme, La Vie, La Liberté” hatin berzkirin. Beşdaran pankartên ku balê dikşîne ser têkoşîna wekhevî, azadî û edaletê ya jinan, hilgirtin. Di pankartan de peyamên wekî Liberté Pour Ocalan” (Ji Ocalan re Azadî), “Résister, S’organiser, Vivre Libre” (Berxwedan, Rêxistinbûn, Jiyana Azad) derketin pêş.
Di dema meşê de peyama Rêber Apo ya têkildarî têkoşîna azadiyê ya jinan bi beşdaran re hate parvekirin. Di peyama Ocalan de hate destnîşankirin ku jin bingeha azadiya civakî ava dikin û hate diyarkirin ku têkoşîna birêxistinkirî ya jinan di aştiya cîhanê de xwedî girîngiyekî mezin e.
Parêzvanên mafên mirovan ên Fransî ku beşdarî çalakiyê bûn, piştevaniya xwe ya ji bo têkoşîna jinên Kurd anîn ser ziman.
Di tevahiya meşê de îşaret bi tundî, newehkevî û zexta ku jin rûbirû dimînin hate kirin. Bi taybetî zehmetiyên ku jin li Rojhilata Navîn dijîn û têkoşîna azadiyê ya jinên Kurd derket pêş. Beşdaran destnîşankirin ku azadiya jinan te wateya azadiya civakê û diyarkirin ku ev têkoşîn ji bo her kesî çavkaniya îlhamê ye. Beşdaran bi gerandina govendê bi coş bûn û careke din têkoşîna xwe anîn ser ziman. Jinên ku piştî meşê li Vieux Portê li hev civiyan, di axaftinên li vir de peyamên xwe yên ji bo wate û girîngiya rojê parvekirin.
MULHOUSE
Li bajarê Mulhousê ya Fransayê 8’ê Adarê Roja Jinên Kedkar ên Cîhanê bi coş hate pîrozkirin. Di çarçoveya 8’ê Adarê Roja Jinên Kedkar ên Cîhanê de bi beşdarbûna jinên Tirkiye-Bakurê Kurdistanê û Fransî, ji aliyê Însiyatîfa Jinê ya Mulhousê ve meş hate lidarxistin.
Jinan di tevahiya meşê de dirûşmeyên “Jin, Jiyan, Azadî”, “Bijî 8’ê Adarê”, “Bijî Piştevaniya Jinê ya Entrnasyonal” hatin berzkirin. Çalakî piştî meşê bi axaftinan dewam kir.
Çalakî piştî axaftinan bi tilîlî û gerandina govendê bi dawî bû.
STRASBOURG
Li bajarê Strasbpurg ê Fransayê bi boneya 8’ê Adarê Roja Jinên Kedkar ên Cîhanê ji aliyê 25 sazî û komeleyên ku Komuna Jinê ya Zînê de jî di nav de çalakî hate lidarxistin û bi hezaran kes beşdarî çalakiyê bûn. Di meşa ku ji Place Kleberê heta Place Republiqueyê hate kirin de peyama têkoşîn hevpar a li dijî baviksalarî, kapîtalîzm, emperyalîzm, nîjadperestiyê derket pêş.
NANTES
Bi boneya 8’ê Adarê Roja Jinên Kedkar ên Cîhanê bi hezaran jin li bajarê Nantesê li hev civiyan û meşiyan. Meş bi pêşengiya Meclîsa Jinê ya Navenda Civaka Kurd a Demokratîk a Nantesê û organîzasyona avaniyên femînîst, sendîka û saziyên jinan ve bi coşekî mezin hate lidarxistikn.
Meş ji Place Commersê heta Place Graslinê dewam kir. Di meşê de îşaret bi girîngiya têkoşîna hevpar a jinan a li dijî desthilatarî, kedxwazî û emperyalîzmê hate kirin. Di tevahiya meşê de dirûşmeya “Jin, Jiyan, Azadî” bi Kurdî û Fransî hate berzkirin.
