Li gorî nûçeya Ajansa Mezopotamyayê li aliyekî ji bo çareserkirina pirsgirêka Kurd di bin banê Meclisê de amadekariya avakirina komîsyonê tê kirin û li aliyê din jî tê hêvîkirin ku PKK ji bo çekdanînê gavên pratîkî bavêje.
Li gorî nûçeyê, tê hêvîkirin ku Rêber Apo rasterast bang li hêzên gerîla bike. Di çarçoveya vê bangê de wê komek PKK’ê bi merasîmek sembolîk çekan deynin û tê payîn ku di nava wan de rêveberên payebilind jî hebin.
Serokê Meclisê Numan Kurtulmuş hefteya borî li ser damezrandina komîsyonê bi nûnerên partiyên siyasî re hevdîtin kir. Tê hêvîkirin ku hemû partî vê hefteyê pêşniyarên xwe yên nivîskî pêşkêş bikin. Aramanca “Komîsyona Aştiya Civakî û Demokratîkbûnê” ew e ku hem binesaziya yasayî ya pêvajoya “çekdanînê” ava bike û hem jî gavên demokratîkbûnê bigire dest.
Tê plankirin ku ji bo nîşandayîna niyeta baş wê komeke PKKê, li Herêma Kurdistanê merasîma çekdanînê li dar bixe û ev merasîm wê li ber çavên raya giştî bi awayekî zindî were weşandin. Hat destnîşankirin ku wê nûnerên partiyên siyasî, saziyên sivîl û çapemenî ji bo merasîmê werin vexwendin û di merasîmê de peyama “Em amade ne ku beşdarî siyaseta demokratîk bibin” wê were dayin.
Qonaxeke din a krîtîk a pêvajoyê ya ku di rojên hevdîtina Şandeya Îmraliyê ya DEM Partî û Serokkomar Erdogan a ku tê payîn di rojên pêş de pêk bê ye. Di hevdîtinê de rewşa heyî û siberoja pêvajoyê wê were nîqaşkirin.
Bingeha pêvajoyê xwe dispêre “Banga Aştî û Civaka Demokratîk” a Rêber Apo ya di 27’ê Sibatê de hatibû ragihandin û pêşniyara bidawîkirina têkoşîna çekdarî ya PKK’ê. PKK’ê li ser vê bangê di kongreya ku di meha Gulanê de li dar xist biryara fesixkirina rêxistinê û bêçekbûnê da. Ji ber ku hikûmetê gavên şênber neavêt hatibû rexnekirin.
DEM Partî destnîşan kiribû ku divê komîsyon li ser bingeha lihevkirinek berfireh a civakî bixebite û diyar kiribû ku bi pêşengiya Rêber Apo pêvajo tê birêvebirin. CHP jî erênî nêzîkî pêvajoyê dibe. Piştgiriya muxalefetê ya ji bo ku pêvajo li ser bingeha Meclisê were birêvebirin, weke hêvîder tê şîrovekirin.
Di rojên pêş de, hem banga ku ji Rêber Apo tê hêvîkirin û hem jî gavên pratîkî yên ku ji PKK’ê werin, dibe ku vê pêvajoyê derbasî qonaxeke nû bike. Bersiva vê gavê girêdayî gavên şênber ên qanûnî û siyasî ku hikûmet biavêje ye.
