Endamên Heyeta Îmraliyê ya DEM Partiyê Pervîn Bûldan, Mîthat Sancar û Faîk Ozgur Erol bi Wezîrê Edaletê Yilmaz Tûnç re hevdîtin kirin. Piştî hevdîtina ku saet û nîvekê dewam kir, li pêşiya Wezareta Edaletê daxuyaniyek hate dayin.
Mîthat Sancar bi navê heyetê axivî û diyar kir ku wan bi Wezîrê Edaletê û burokratên têkildar re hevdîtineke berfireh kirin, li gel pirsgirêkên hiqûq û edaletê yên di rojevê de wan sererastkirinên hiqûqî yên li ser pêvajoyê nirxandin. Sancar anî ziman ku wan hem li ser karên ku Wezaret dimeşîne agahî wergirtin hem jî pêşniyarên xwe pêşkêş kirin.
Sancar destnîşan kir ku aştî tenê bi zemîna edaletê û ewlehiya hiqûqî dikare mayinde bibe û diyar kir ku di vê mijarê de roleke girîng dikeve ser milê Wezareta Edaletê. Sancar anî ziman ku Paketa Dadgeriyê ya 11’emîn a ku li Meclîsê tê nirxandin jî di nav de mijarên edalet û wekheviya di înfazê de di hevdîtinê de hatin nirxandin û ragihand ku wan dîtin ku li Wezareta Edaletê pêvajoyeke amadekariyê ya berfireh tê meşandin. Sancar got, armanca wan ew e ku aştiyê bi hiqûqê misoger bikin, li ser zemîna edaletê mayinde bikin û ragihand ku hevdîtinên wan wê dewam bikin.
Pervîn Bûldan jî anî ziman ku hevdîtin berhemdar derbas bû, bi taybetî amadekariyên li ser qanûna têkildarî pêvajoya aştiyê tê plankirin, nirxandin. Her wiha diyar kir ku binpêkirinên mafên mirovan, rewşa girtiyên nexweş û extiyar ên li girtîgehan û girtiyên înfaza wan hate şewitandin kete rojevê.
Pervîn Bûldan diyar kir ku ji ber pirsgirêkên li desteyên çavdêrî û îdareyê gelek girtî nayên berdan û got, di vê mijarê de wan nêrîn û pêşniyarên xwe pêşkêşî Wezaretê kirin. Bûldan ragihand ku daxwazên xwe yên li ser Qanûna COVID û wekheviya di înfazê de anîn ziman û ji ber nêzîkatiya çêker a Wezîrê Edaletê spasiyên xwe pêşkêş kir.
Endamên heyetê işaret bi girîngiya temamkirina amadekariyan a di demeke kin de kirin û gotin, ji bo rêveçûna erênî ya pêvajoyê wê diyalog û şêwirmendiyên xwe dewam bikin.
