Di doza têkildarî kurultayên CHP’ê yên ku tê de Ozgur Ozel wekî serokê giştî hatibû hilbijartin de, dadgeha îstînafê biryara “butlana teqez” da. Di doza ku der barê kurultaya CHP’ê ya sala 2023’an de hatibû vekirin de, dadgehê biryara butlana teqez a ku derbasbûna hiqûqî ya kurultayê ji holê radike, da. Hat diyarkirin ku biryar bi tevdîrî hatiye dayîn.
KILIÇDAROGLU DÊ BÊ SER RÊVEBERİYÊ
Di biryarê de hat hukimkirin ku Kemal Kılıçdaroglu û rêveberiya wî wekî xwe berdewamî li ser karê xwe bikin. Hat diyarkirin ku rêveberiya heyî ya partiyê dê bi awayekî tevdîrî ji erkê were dûrxistin. Di biryara bi hincet de hat destnîşankirin ku rêya temyîzê li ber Dadgeha Bilind vekirî ye. Di biryarê de hat gotin: “Di encama lêkolîna li ser dosyeyê de, bi şerta ku di nava du hefteyan de ji roja ragihandina biryarê ve rêya temyîzê li dadgeha bilind vekirî be, di 21/05/2026’an de bi yekdengî biryar hat dayîn.”
DRN YA CHP’Ê CIVÎNA AWARTE LIDARXIST
Piştî biryarê, li Navenda Giştî ya CHP’ê di bin serokatiya Ozgur Ozel de Desteya Rêveberiya Navendî (DRN) bi awayekî awarte civiya. Rêveberiya partiyê biryar girt ku Navenda Giştî ya CHP’ê neyê terkkirin.
Hat ragihandin ku civîna Şaredarên Bajarên Mezin a CHP’ê ku dihat payîn sibê li Giresunê were çêkirin jî hatiye betalkirin.
BORSAYÊ ZIRAR DÎT
Vê biryarê li Borsa Stenbolê bandoreke mîna erdhejê çêkir. Borsa Stenbolê ku roj bi neyînî derbas dikir, piştî vê nûçeyê zirarên xwe kûrtir kirin. Di endeksa BIST 100’î de zirar ji sedî 6’an û di endeksa bankevaniyê de jî ji sedî 8’an derbas kir.
