Hevserokê berê yê Partiya Wekhevî û Demokrasiyê ya Gelan (DEM Partî) Stewrê Mehmet Salih Gultekîn di doza ku bi sûcdariya “propagandaya rêxistinê kiriye” dihat darizandin, biryar hat dayîn.
Gultekîn beşdarî danişîna ku li 2’yemîn Dadgeha Cezaya Giran a Mêrdînê hat dîtin nebû, lê parêzerê wî amade bû. Piştî tepîtkirina nasnameyê, şandeya dadgehê salek û 6 meh ceza li Gultekîn birî.
Dadgehê stranên Kurdî yên ku di dîmenên Gultekîn li ser hesabê xwe yê medyaya dîjîtal parve kiriye wekî sedema dayîna cezayê nirxand.
Parvekirinên medyaya dîjîtal a bi dîroka 28’ê Tîrmeha 2024’an de strana “Halkimin Umudu Gerîlla” ku ji hêla Hozan Serhat ve hatiye gotin û strana “Mazlum Dogan” ku ji hêla Hozan Diyar ve hatiye gotin a bi dîroka 29’ê Nîsana 2022’yan di dosyayê de cih girtin.
‘DI DÎMENAN DE HÊMANÊN SÛC TINEYE’
Parêzerê Gultekîn Nurullah Oner bertek nîşanî biryarê da û diyar kir ku di dosyaya wekî propagandayê hatiye nirxandin de tu kes, sembol an jî hêmaneke sûc tineye.
Oner got”, “Dîmenê kirine hinceta sûc, ji qadeke hêşînayî pêk tê. Tevî vê yekê jî stran wekî hincet hat nîşandan û ceza hat dayîn.”
Oner adiyar kir ku biryar der hiqûqî ye û anî ziman ku ew ê dosyayê bibin Dadgeha Îstînafê ya Herêmê.
Oner wiha berdeam kir: “Em ê di rojên pêş de serî li îstînafê bidin. Ji bo rakirina biryarê em ê serî li hemê rêyên hiqûqî bidin.”
