Ji bo gerîlayê HPG’ê Masîro Dêrik (Hesen Ehmed Abdullah) yê ku 19’ê Hezîrana 2023’yan li Herêmên Parastinê yên Medyayê şehîd bibû û şervanê Hêzên Erka Xweparastinê Ramiz Mihemed Bîlal ê ku 9’ê Cotmehê li Dêrikê şehîd bibû, merasîma seraxiyê li navenda Tevgera Ciwanên Şoreşer ên Sûriyeyê ya Şehîd Bawer a li Dêrikê hat lidar xistin.
Bi sedan şêniyên Dêrik, Girkê Legê û Çilaxa yên kantona Cizîrê beşdarî merasîmê bûn. Merasîm bi deqeyek rêzirtin ji bo bîranîna şehîdên têkoşîna azadiyê dest pê kir. Piştre endama Meclîsa Malbatên Şehîdan a Dêrikê Xedîce Hebeş axivî û got: “Em aşiqên aştî û azadiyê ne. Zarokên me jî di rêya aştî û azadiyê de şehîd dibin. Dema em dibêjin şehîd ev ne tenê xîbatek e, lê belê nûkirina soza domadina rêya wan ta pêkanîna serketin û aştiyê ye.”
Hevserokê Meclîsa PYD’ê ya bajarê Dêrikê Ciwan Hesen jî axivî û destnîşan kir ku gelê Bakur û Rojhilatê Sûriyeyê bi têkoşîna xwe ya demdirêj karibû îradeya xwe li ser erdê ferz bike. Hesen, bi domdarî got “Bi ked û xwîna şehîdan her buhostek ji vî erdê hat rizgarkirin. Îro em li vî cihî pîroz behsa şoreşa xwe ya bi pêşketina tevgera azadiyê û Rêber Abdullah Ocalan dikin ku li hemberî hemû cûreyên dagirkerî û despotîzmê li ber xwe dan.”
Ciwan Hesen, destnîşan kir ku gelê herêmê ji bo parastina rûmeta xwe canê xwe feda kir, komployên hundir û derve û êrîşên DAÎŞ’ê têk birin.
Merasîm bi dirûşmên “Şehîd namirin” bi dawî bû.
