Komîteya Gel û Baweriyan a KCK’ê di daxuyaniya xwe de şehîdên Kerbelayê bi bîr anî û got, “Di vê mehê de ku Berxwedana Kerbela tê bîranîn, Ehlî Beyt ê li Kerbelayê şehîd bû tê bîranîn, em hêvî dikin ku rojiya 12 Îmaman a civaka Elewî û alema Şîa û pariyên Aşûre ji aliyê Heq ve bê qebûlkirin.”
Daxuyaniya KCK’ê bi vî rengî ye: “Di nava atmosfereke welê de ku di çarçoveya Banga Civaka Demokratîk a Rêber Apo de bûyer diqewimin û di nava şert û mercên destwerdana hêzên hegemonîk a bi pêşengiay Îsraîlê li hemberî Îranê de em ketine meha Mûharremê. Di vê mehê de ku Berxwedana Kerbela tê bîranîn, Ehlî Beyt ê li Kerbelayê şehîd bû tê bîranîn, em hêvî dikin ku rojiya 12 Îmaman a civaka Elewî û alema Şîa û pariyên Aşûre ji aliyê Heq ve bê qebûlkirin.
Berxwedana ku bi pêşengiya Îmam Huseyîn li Kerbelayê li hemberî artêşên Yezît hate kirin, xwedî wateyeke dîrokî ye. Li hemberî Xanedanê Emewî Mûaviye û kurê wî Yezît ku cewhera civakî û komunal a Îslamê datanî aliyekî û dixwest Îslamê bike amûrek desthilatdariyê ji bo xanedana xwe, ev berxwedan berxwedana parastina cewhera demokratîk û komunal a mirovahiyê û ola Îslamê ye. Li hemberî zilm, neheqî, dijberiya li civakê û nêzîkatiyên desthilatdarîperest, ev berxweedana mezin ji bo parastina cewhera komunal a civakî û Îslamê hate kirin. Lewma ev berxwedana mezin dîrokî ye û bandora wê 1400 sal in di asteke girîng de dewam dike. Bîranîna şehîdên esîl ên vê berxwedana mezin di şexsê Îmam Huseyîn de û Rojiya 12 Îmaman a ji bo nîşandana dilsoziya bi armancên wan, pariyê Aşûreyê yê heman piştre tê parvekirin, ji ber vê yekê xwedî kûrahiya wateyeke mezin e. Lewma em niyaz dikin ku xizmetên canên Elewî li lênûska heq bê nivîsandin ku bi ruh, hişmendî û baweriya berxwedana Kerbelayê rojiyê digirin û pariyan parve dikin. Em di wê baweriyê de ne ku îbadet û duayên Misilmanên Şîa yên bi heman hest û fikrî Kerbelayê bi bîr tînin, ji aliyê wateya Îslam a demokratîk ve gelekî hêja ye.
Bi destê nûnerên vê serdemê yê sîstema delwetperest-desthilatdarîperest a ku li dijî cewhera komunal û demokratîk a civakê ye, herêma me veguheriye gola xwînê. Erdnîgariya Rojhilata Navîn piştî Şerê Cîhanê yê 1’emîn weke dewlet netewe hate parçekirin. Li vê erdnîgariya ji gelek ziman, çand û nasnameyan, zêdeyî sed sal in bi destê netewe dewletan li hemberî cihêrengiyan komkujiyên mezin hatin kirin. Hate xwestin ku bi zordariyê, zext û zilmê nasname û baweriyên cuda bêne qirkirin. Îro bi navê Şerê Cîhanê yê 3’yemîn tê xwestin Rojhilata Navîn li ser bingeha berjewendiyên hêzên hegemonîk kapîtalîst ji nû ve bê dîzaynkirin. Şerê navbera hêzên hegemonîk ên kapîtalîst û hêzên desthilatdariyê yên statukoparêz ku dixwazin li herêmê serweriya xwe dewam bikin, herî zêde bandorê li gel û baweriyên herêmê dike. Di şerê 20 salên dawî de li herêma me di vê çarçoveyê de hatin kirin, bi milyonan mirovî jiyana xwe ji dest dan, bi dehan milyon mirov ji cih û warê xwe bûn. Û ev pêvajoya komkujiyê bi şerê Îsraîl-Îranê re hîn bêhtir kûr bûye û dewam dike.
Çareseriya pirsgirêkên civakî yên li Rojhilata Navîn ne bi netewe dewletên ji karaktera faşîst û tekperest, ne jî bi nêzîkariyên parçekirinê yên li ser bingeha berjewendiyên hêzên hegemonîk dibe. Herdu jî li taybetmendiya pir nasnameyî û pir çandî yên Rojhilata Navîn nayên. Ji bilî komkujî, şer, sîstemên zext û zilmê tiştekî din bi xwe re nînin. Çareseriya yekane ya rast û encamgir çareseriya neteweya demokratîk e ku Rêber Apo destnîşan kiriye. Çareseriya neteweya demokratîk ku li cihêrengiyan vekirî ye, hemû cihêrengî dikarin xwe îfade bikin, mejiyê tekperest, homojenkirinê, neteweperest, olperest, pozîtîvîst û zayendîperest ên netewe dewletan red dike, xwedî wê kapasîteyê ye ku çareseriyê ji pirsgirêkên civakî yên li Rojhilata Navîn re bibîne, çareseriya herî guncaw e ku li taybetmendiya civakî tê.
Di vê serdemê de xwedîderketina herî bi wate ya li Berxwedana Kerbela û Îmam Huseyîn xwedîderketina li çareseriya neteweya demokratîk e, tevlîbûna bê fikar a li avakirina civaka demokratîk e. Lewma xwedîderketina li banga civaka demokratîk a Rêber Apo, esaswergirtina xeta neteweya demokratîk û meşandina têkoşîneke bi wate ya di vê oxirê de, di serî de civata Elewî û Şîa wezîfe û berpirsyariya bingehîn a nasnameyên baweriyan û gelên Rojhilata Navîn e. Baweriya Elewî jî tenê bi vê rêyê dikare hebûna xwe ewle bike û bibe xwedî şert û mercên jiyana azad a baweriya xwe.
Bi vê wesîleyê em şehîdên Kerbelayê hemûyan bi hurmet bi bîr tînin, bang li canên Elewî hemûyan, hêzên alîgirê demokrasî û azadiyê dikin ku xwedî li banga civaka demokratîk derkevin û pêşengiyê ji têkoşîna neteweya demokratîk re bikin.”
