Di nav de rêxistinên navneteweyî jî bi giştî 15 saziyan têkildarî 4 rojnamegerên di 18’ê Sibatê di çarçoveya operasyona navenda wê Stenbolê de hatin binçavkirin, dxuyaniyeke nivîskî dan. Di daxuyaniyê de hat bibîrxistin ku rojnameger Yildiz Tar, Elîf Akgul, Ercument Akdenîz û Ender Îmrek di çarçoveya operasyona li dijî HDK’ê de hatine binçavkirin.
Bi domdarî hat gotin ku ji bo îfadeyê li şûna bangî rojnamegeran bikin bi ser malên wan de tên girtin û wiha hate gotin: “Ev yek, êrişeke li dijî mafê agahî girtinê ye. Nehiştin rojnameger bi parêzerên xwe re hevdîtinê bikin û têkildarî dosyayê agahî nedan.” Bi domdarî hat bibîrxistin ku di meha çileyê de 18 rojnameger û di hefteya yekemîn a Sibatê de jî li Wanê 6 rojnameger hatine binçavkirin.
Bang li dewletê hate kirin ku êrişên xwe yên li ser rojnamegeran bi dawî bike û rojnameger Yildiz Tar, Elîf Akgul, Ercument Akdenîz û Ender Îmrek tavilê bên berdan.
Saziyên daxuyanî îmze kirin: “Komeleya Xebatên Medya û Hiqûqê (MLSA), Navenda Azadiya Çapemenî û Medyayê ya Ewropayê (ECPMF), Komeleya Rojnamegeran a Dîcle Firatê (DFGD), Cemiyeta Rojnamegeran (Enqere, Komeleya Rojnamegerên Jin a Mezopotamyayê (MKG), Komeleya Rojnamegerên Jin, Sendîkaya Rojnamegan a Tirkiyeyê (TGS), DÎSK Basin-Îş, KESK Haber-Sen, Enstîtûya Çapemeniyê ya Navneteweyî (IPI), Osservatorio Balcani Caucaso Transeuropa (OBCT), Cemiyeta Rojnamegeran, Komeleya Rojnamegerên Serbixwe ya Punto24’ê (P24), Komeleya Rojnamegerên Hemdem (ÇGD) û Federasyona Rojnamegeran a Ewropayê (EFJ).”
