Hate ragihandin ku li bajarê Silêmaniyeyê di 12’yê Sibatê de jinek ji Rojhilatê Kurdistanê bi guleyê hate qetilkirin.
Tora Mafê Mirovan a Kurdistanê têkildarî bûyerê agahiyan belav kir. Hate diyarkirin ku jina hatî qetilkirin Kurd e û bi navê Xatire û bi nasnav Awate, ji bajarê Merîwan ê Rojhilatê Kurdistanê ye.
Li gorî Tora Mafê Mirovan a Kurdistanê, Xatire ji aliyê mêrekî ve çend caran rûbirûyê pirsgirêkan bû û hatibû tehdîtkirin.
Hate destnîşankirin ku Xatire doz li dijî vî mêrî vekiribû ku demekê hatibû binçavkirin û girtin, lê gefên xwe dewam kiribû û gotibû ku ‘piştî serbestberdana wî ew ê tola xwe jê hilîne’.
Tora Mafê Mirovan da zanîn ku piştî qetilkirina Xatire, kujer ji aliyê polîsên Silêmaniyê ve hatiye binçavkirin.
Xatire zewicî bû û dayîka zarokekê bû ku di van salên dawî de li Silêmaniyê kar dikir. Xatire ango Awat di 12’yê Sibatê de di avahiyek ya projeyek niştecîbûnê ya li bajarê Silêmaniyê bi guleyekê hate qetilkirin. Polîsan lêpirsîn da destpêkirin.
Hêjayî gotinê ye li gorî amarên ajansa me berhevkirine, di meha borî de li Başûrê Kurdistanê jinek hatibû qetilkirin û 4 jin jî bi awayekî guman jiyana xwe ji dest dan, li gel vê 2 jin jî birîndar bûn.
