Înîsiyatîfa Yekîtiya Demokratîk 11’ê Gulanê dest bi kar kir. Înîsiyatîf ku bi kombûna nûnerên partiyên siyasî, rêxistinên civakî yên sivîl û saziyên baweriyan û demokratîk hate avakirin, maf û daxwazên civakê yên bindest û înkarkirî diparêze. Hevberdevkê Înîsiyatîfa Yekîtiya Demokratîk û Parlamenterê Amedê yê DEM Partiyê Mehmet Kamaç ji ANF’ê re li ser mijarê axivî.
Kamaç diyar kir ku înîsiyatîf encama karekî ji 11 mehan e û got, “Ne karek e ku piştî daxuyaniya kongreyê ya PKK’ê hate destpêkirin. Ji bo gelên ku li vê erdnîgariyê têne înkar kirin, asîmîlekirin, ji aliyê dîrokî ve bûna wan li ber tinebûnê ye, pêwîstî bi tiştekî hebû ku mafên wan ên bingehîn biparêze. Înîsiyatîfa Yekîtiya Demokratîk jî berhemek ji vî karê ji ber vê pêwîstiyê bû. Di serî de Kurdên li Bakurê Kurdistanê wê bibe sîwaneke hevpar a Kurdan û hemû rengên cuda yên îdeolojîk, baweriyê yên li nava Kurdan.”
Kamaç anî ziman ku Înîsiyatîfa Yekîtiya Demokratîk di serî de Kurdan beşeke berfireh a civakê vedihewîne û got, “Ji bo Kurdan sernavê herî bingehîn yekîtiya neteweyî ye. Pirsgirêka yekîtiya neteweyî veguheriye trajediyeke ji sedan salî. Eger ewqasî mafên bingehîn ên Kurdan têne înkarkirin, hebûna Kurdan tê înkarkirin, zimanê Kurdan tê înkarkirin an jî tine tê hesibandin, cografya Kurdan hatibe parçekirin, her wiha Kurd li nava gelên cîhanê ji mafên xwe yên bingehîn bêpar hatibe hiştin, sedema bingehîn a vê yekê ew e ku nekarîne yekîtiya xwe pêk bînin. Ev yek sernavekî sereke yê rojevê bû. Pêkhate hemû li ser vê mijarê hemfikir bûn.”
Kamaç têkildarî berpirsyarî û wezîfeya xwe ya li ser mijara civakîbûna aştiyê jî got, “Piştî fesixkirina PKK’ê di mijara çareseriya demokratîk a pirsgirêka Kurd de hîn bêhtir wezîfe dikeve ser milê Înîsiyatîfa Yekîtiya Demokratîk. Em di wê baweriyê de ne ku em ê karên hîn mezin bikin. Haya me ji karên divê bêne kirin heye. Em ê çareseriya bi rêbazên demokratîk ên pirsgirêkê bikin karê sereke.”
